თბილისში ავარიული მრავალბინიანი საცხოვრებელი სახლების ჩანაცვლების წესი იცვლება. ცვლილების თანახმად, თუ აქამდე ავარიული სახლების ჩანაცვლება იმ შემთხვევაში დაიშვებოდა, როდესაც მისი ავარიულობის ხარისხი III, IV, ან V კატეგორიის იყო და მის ჩანაცვლებაზე დაინტერესებული პირების სრული თანხმობა იქნებოდა, ცვლილებების მიხედვით პროექტის განმახორციელებელი უფლებამოსილია, რომ ავარიული სახლის ჩანაცვლება სხვა მიწის ნაკვეთზე, დაინტერესებულ პირთა სრული თანხმობის გარეშე, განიხილოს.

სამშენებლო სამართლის დოქტორმა უჩა ზაქაშვილმა რადიო „კომერსანტის“ ეთერში განაცხადა, რომ საკრებულოს დადგენილებით დარღვეულია კანონი და კონსტიტუცია, რადგან კანონი არ ითვალისწინებს ავარიული კერძო საკუთრების სხვა მისამართზე ჩანაცვლების შესაძლებლობას.

„არსებული კანონით, თუ მოსახლეობის 50+1 არის თანახმა, მუნიციპალიტეტს შეუძლია განახორციელოს ქალაქმშენებლობის ღონისძიებები, დაანგრიოს ძველი და ააშენოს ახალი, მაგრამ სხვა ადგილზე გადაყვანა კანონით გათვალისწინებული არ არის. ეს საკრებულოს თვითშემოქმედებაა, რაც არსებულ კანონს და კონსტიტუციას ეწინააღმდეგება.

მოქმედი კანონმდებლობა არ იძლევა მუნიციპალიტეტებისთვის იმის თავისუფლებას, რომ გადაუხვიონ კანონმდებლობით დადგენილ ნორმებს და საკუთარი შეხედულებისამებრ დაარეგულირონ ისეთი სენსიტიური საკითხები, როგორიცაა კერძო საკუთრების ფლობა“ - აცხადებს უჩა ზაქაშვილი.

მისი თქმით, საკრებულოს დადგენილების ამ სახით აღსრულება საკუთრების უფლების ხელყოფა და მოქმედი კანონმდებლობის დარღვევაა.

„თუ პროექტის იმ სახით განხორციელება დაიწყო, როგორც საკრებულოს სურს, მესაკუთრეების მხრიდან სასარჩელო წარმოებები გახდება საჭირო. ჩვენ რამდენიც არ უნდა ვილაპარაკოთ, რომ საკრებულოს დადგენილება კანონს ეწინააღმდეგება, ეს ან საკრებულომ უნდა აღიაროს და გაასწოროს, ან სასამართლოს კონტროლის ქვეშ უნდა განხორციელდეს. აქედან გამომდინარე, მესაკუთრეები თუ ნახავენ, რომ მათი თანხმობის გარეშე ისეთ ადგილზე სთავაზობენ ბინას, რაც მათთვის მიუღებელია, შეუძლიათ სასარჩელო წარმოებები დაიწყონ,“ - აცხადებს უჩა ზაქაშვილი.