საკრედიტო-საგარანტიო სქემაში ცვლილებები შევიდა და პროგრამის ბიუჯეტი 20 მილიონი ლარიდან 300 მილიონ ლარამდე გაიზარდა. ცვლილების პროექტი საქართველოს მთავრობის სხდომაზე დამტკიცდა.
„საკრედიტო-საგარანტიო სქემაში კიდევ ერთი მნიშვნელოვანი სიახლე შევიდა - პროგრამაში ბანკების გარდა მიკროსაფინანსო ორგანიზაციებიც ერთვებიან, რისთვისაც დამატებით 30 მლნ ლარის ბიუჯეტი გამოიყოფა. მთლიანად საკრედიტო-საგარანტიო სქემისთვის 330 მილიონი ლარის ბიუჯეტი გამოიყოფა, რაც ნიშნავს, რომ მიკროსაფინანსო ორგანიზაციების სესხების მიმღები მიკრო და მცირე ბიზნესები 20 000 ლარის და ზევით სესხის მიღების მსურველები შეძლებენ, რომ ისარგებლონ ჩვენი თანაუზრუნველყოფით სესხის 90% -ის ოდენობით“, - განაცხადა ეკონომიკისა და მდგრადი განვითარების მინისტრმა ნათია თურნავამ.
„მიკროსაფინანსო ორგანიზაციების ასოციაციის“ ხელმძღვანელი ბესო შენგელია მიიჩნევს, რომ საკრედიტო-საგარანტიო სქემის ამოქმედება დადებითი მოვლენაა, თუმცა ბევრი ტექნიკური დეტალია მისოებისთვის შესაცვლელი და რადგან მთავრობამ აღნიშნული პროექტი მხოლოდ ბანკებს მოარგო.
„ძალიან კარგია საკრედიტო-საგარანტიო სქემის ამოქმედება, მაგრამ მიკროსაფინანსო ორგანიზაციებს რომ გადმოგვეგზავნა ხელშეკრულების ნიმუში, გავეცანით და ტექნიკური ხასიათის შენიშვნები გვაქვს, თუ ეს ყველაფერი მოგვარდება აღნიშნული პროექტი ჩვენი სექტორისთვის ძალიან სასარგებლო იქნება. შენიშვნები საკმაოდ ბევრია, მარტივად რომ ვთქვათ მთელი ეს სქემა კომერციულ ბანკებზე იყო მორგებული, შესაბამისად უბრალოდ დააკოპირეს და ჩვენ გადმოგვიგზავნეს. თუმცა, ბანკებისგან განსხვავებით ბევრი ტექნიკური საკითხია რომელიც მიკროსაფინანსო სექტორთან არ არის თავსებადი, ჩვენი სპეციფიკა არ არის გათვალისწინებული, ამიტომ დასახვეწია. პროექტის იდეა გულისხმობს, რომ საგარანტიო ფონდი საკრედიტო რისკებს აზღვევს, ეს თავისთავად იმას ნიშნავს, რომ მცირე და საშუალო ბიზნესის დასაკრედიტებლად საფინანსო ინსტიტუტები მეტ რისკს აიღებენ რადგან ეს რისკი დაზღვეულია. რისკის დაზღვევა რა თქმა უნდა საპროცენტო განაკვეთებზეც აისახება და ის დაიკლებს, მეორეს მხრივ მიკროსაფინანსო სექტორის ეფექტურობა გაიზრდება და კომერციულ ბანკებთან მიმართებაში ბიზნესს უფრო კონკურენტულ საპროცენტო განაკვეთებს შევთავაზებთ. თუმცა, კიდევ ერთხელ ხაზს ვუსვამ, რომ ეს ყველაფერი იმ შემთხვევაში მოხდება თუ ჩვენს შენიშვნებს გაითვალისწინებენ“, - განაცხადა ბესო შენგელიამ.
აღსანიშნავია, რომ საკრედიტო გარანტია წარმოადგენს სააგენტოსა და კომერციულ ბანკს ან მიკროსაფინანსო ორგანიზაციებს შორის პროგრამის ფარგლებში გაცემული სესხების დეფოლტის საფუძველზე წარმოქმნილი ფინანსური რისკის გადანაწილების ინსტრუმენტს. პროგრამის ფარგლებში საფინანსო ორგანიზაციის მიერ გაცემულ თითოეულ სესხზე, სახელმწიფო გარანტია სესხის ძირი თანხის არაუმეტეს 90 პროცენტს შეადგენს, ხოლო რესტრუქტურიზებულ სესხზე ძირი თანხის არაუმეტეს – 30 პროცენტს.
კომერციული ბანკის მიერ გაცემული სესხებისთვის საგარანტიო თანხის უზრუნველყოფის მიზნით, საქართველოს ეკონომიკისა და მდგრადი განვითარების სამინისტროს სააგენტო – „აწარმოე საქართველოში“ უფლებამოსილია, კომერციულ ბანკში გახსნას სადეპოზიტო ანგარიში.
ნინო თამაზაშვილი