დეკემბერში ინფლაციის წლიურმა განაკვეთმა 13.9%-ს მიაღწია, სამომხმარებლო კალათაში შესული 305 დასახელების პროდუქტიდან 96 უფრო მაღალი პროცენტული მაჩვენებლით გაძვირდა. სოციალურად დაუცველი ადამიანებისთვის განსაკუთრებულად მძიმე საკვების გაძვირება აღმოჩნდა.

ინფლაციის ფორმირებაში კომუნალური გადასახადების ზრდამ მნიშვნელოვანი როლი შეასრულა. წყლის გადასახადი 77%-ით არის გაზრდილი, ბუნებრივი გაზის 76%-ით, ხოლო ელექტროენერგიის 65%-ით. მან საერთო ჯამში ინფლაცია 3.64%-ით გაზარდა.

ყველაზე მეტად მოსახლეობის სოციალურ ყოფაზე საკვების გაძვირებამ იმოქმედა. სურსათისა და უალკოჰოლო სასმელების ჯგუფიდან კომბოსტო 199%-ით გაძვირდა, ქლიავი 51%-ით, კვერცხი 38%-ით, ზეთი 36%-ით, ჭარხალი 34%-ით, შაქარი 33%-ით, კარტოფილი ასევე 33%-ით, წიწიბურა 28%-ით, სტაფილო 27%-ით, ხინკალი 24%-ით, პური 22%-ით, გაყინული ქათამი 21%-ით, სულგუნი 20%-ით, თევზი 19%-ით, შოკოლადი ასევე 19%-ით, მაიონეზი 18%-ით, ნიგოზი 15%-ით, ძეხვი 14%-ით... საკვების გაძვირება ინფლაციაში ყველაზე მკვეთრად 5%-ით აისახა.

ბოლო ერთ წელიწადში დიზელი 35%-ით, ხოლო ბენზინი 40%-ით გაძვირდა, რამაც ირიბად სხვა პროდუქციის გაძვირებაც გამოიწვია. ორნიშნა ინფლაციის კიდევ ერთი მიზეზი ბიზნესისთვის კომუნალური გადასახადების ზრდა გახდა. მწარმოებლებმა გაზრდილი ხარჯი პროდუქციის საბოლოო ფასში ასახეს.

ინფლაცია თავისი არსით დაფარული გადასახადია და თუ ნომინალური შემოსავალი უფრო მეტად არ იზრდება ეს ადამიანების გაღარიბებას იწვევს. ოფიციალურად აღიარებული მონაცემებითაც კი 2021 წლის დეკემბრის 1000 ლარს იგივე ძალა ჰქონდა რაც 2020 წლის დეკემბერში 878 ლარს. 2020 წლის დეკემბერში 70 წლამდე პენსიონერები 220 ლარს იღებდნენ, 2021 წლის დეკემბერში 240 ლარს, თუმცა მსყიდველუნარიანობით 2020 წლის დეკემბრის 2020 ლარი 2021 წლის დეკემბრის 251 ლარს უთანაბრდებოდა. ანალოგიური შეიძლება ითქვას 70 წელს გადაცილებულების პენსიაზეც, რომელიც მართალია 250-დან 275 ლარამდე გაიზარდა, მაგრამ 2021 წლის დეკემბერში პენსიონერი თავისი 275 ლარით იმდენივე პროდუქციის შეძენას შეძლებდა, რამდენსაც 2020 წლის დეკემბერში 241 ლარად. თუ იმასაც გავითვალისწინებთ, რომ ღარიბი ადამიანი საკვებზე შემოსავლის უფრო მეტ წილს ხარჯავს მათთვის გასული წლის ინფლაცია კიდევ უფრო მძიმე აღმოჩნდება.