მობილური ინტერნეტისგან განსხვავებით, რომლის ტრაფიკიც წლიდან წლამდე ორნიშნა და ზოგჯერ სამნიშნა პროცენტული მაჩვენებლითაც იზრდება, სასაუბრო დროის ხანგრძლივობა თითქმის არ იცვლება. 2016-2020 წლებში მობილური ინტერნეტის მოხმარება 529%-ით 30.5-დან 192 პეტაბაიტამდე (ათასი ტერაბაიტი) გაიზარდა, სალაპარაკო წუთები კი მხოლოდ 29%-ით 7.9 მლრდ-დან 10.2 მლრდ წუთამდე. 2021 წლის პირველ 10 თვეში ინტერნეტის მოხმარება დამატებით 69%-ით გაიზარდა, სალაპარაკო დროის კი 2%-ით, ანუ 34.5-ჯერ უფრო დაბალი ტემპით. ლიდერის პოზიციას, როგორც ზარების რაოდენობის, ასევე შემოსავლების მიხედვით, მობილური ინტერნეტის მოხმარების მსგავსად, ამ შემთხვევაშიც „მაგთიკომი“ იკავებს.

2019 წლის იანვარ-ოქტომბერში საქართველოში მობილურით სულ 8.283 მლრდ წუთი ილაპარაკეს, 2020 წლის იანვარ-ოქტომბერში 8.380 მლრდ წუთი, 2021 წლის ანალოგიურ პერიოდში კი 8.554 მლრდ წუთი (16 253 წელი) ორ წელიწადში ზრდის ტემპმა 3.2% შეადგინა, იმავე პერიოდში ინტერნეტის მოხმარება 267%-ით გაიზარდა ანუ 83-ჯერ უფრო სწრაფად. იმის გათვალისწინებით, რომ ბოლო 10 წელიწადში მობილური ტელეფონების რაოდენობა უმნიშვნელოდ გაიზარდა, სმარტფონების კი მკვეთრად დინამიკაში ასეთი დისბალანსი კანონზომიერი ხდება.

თუ კომპანიების მიხედვით ჩავშლით 2021 წლის იანვარ-ოქტომბერში, ყველაზე მეტი - 3.200 მლრდ წუთი მაგთის აბონენტებმა ისაუბრეს, ჯეოსელზე 2.864 მლრდ წუთი მოდის, ბილაინზე - 2.490 მლრდ წუთი. წილობრივად მაგთის 37.4% უკავია, ჯეოსელს 33.5% და ბილაინს 29.1%. თითქმის იგივე ვითარება იყო 2019-2020 წლებში იმ მცირე განსხვავებით, რომ 2019 წელს მაგთის წილი 39%-ს შეადგენდა. შედარებისთვის მაგთის წილი მობილური ინტერნეტის გამოყენებაში 52%-ს აჭარბებს.

მიუხედავად იმისა, რომ წუთების რაოდენობაში მაგთი ჯეოსელს მხოლოდ 4%-ით უსწრებს, შემოსავლების დათვლისას სხვაობა მკვეთრად იზრდება. 2019 წლის იანვარ-ოქტომბერში მაგთიმ ხმოვანი ზარებიდან შემოსავლის სახით 68 მლნ ლარი მიიღო, რაც სამივე მობილური ოპერატორის შემოსავლის 55.6%-ს უდრიდა, 2020 წელს მაგთის შემოსავალი ზარებიდან 61.5 მლნ ლარამდე შემცირდა, თუმცა შემოსავლებში წილი 57.7%-მდე გაზარდა, 2021 წელს მაგთის შემოსავალი ზარებიდან 62.8 მლნ ლარამდე, ზარებიდან მიღებულ შემოსავალში არსებული წილი კი 62.8%-მდე გაზარდა. ჯეოსელის წილი ხმოვანი ზარებიდან მიღებულ შემოსავლებში 2019-2021 წლებში 30%-დან 28.1%-მდე შემცირდა, ბილაინის კი 14.5%-დან 12.4%-მდე. 

რაც შეეხება ზარების რაოდენობას ის 2020 წელს შემცირდა, 2021 წელს კი ისევ გაიზარდა, უფრო კონკრეტულად: 2019 წლის პირველ ათ თვეში სულ 4.958 მლრდ ზარი განხორციელდა, 2020 წლის ანალოგიურ პერიოდში - 7.5%-ით ნაკლები - 4.588 მლრდ, ხოლო 2021 წელს, 2020-თან შედარებით 4.1%-ით მეტი - 4.778 მლრდ.

საპირისპირო მდგომარეობაა ზარების ხანგრძლივობის მხრივ: 2019 წელს 1 ზარის ხანგრძლივობა 1.67 წთ-ს ანუ 1 წუთსა და 40 წამს შეადგენდა, 2020 წელს 10 წამით მეტს 1 წუთსა და 50 წამს, 2021 წელს კი 1 წუთსა და 47 წამს. ზარების რაოდენობა ყველაზე მეტად მთელი 30%-ით 2020 წლის აპრილში ყველაზე მკაცრი ლოქდაუნის დროს შემცირდა, ზუსტად იმავე პერიოდში მობილური ინტერნეტის ტრაფიკი 169%-ით გაიზარდა.

კომუნიკაციის კომისიას სტატისტიკაში სამ მთავარ მობილურ ოპერატორთან ერთად ძირითადად როუმინგული მომსახურებისთვის განკუთვნილი გლობალ სელიც აქვს მითითებული, მაგრამ რადგან მათი ჯამური წილი 1%-ზე ნაკლებია, ტენდენციებზე გავლენას ვერ ახდნენ.