2022 წელს ფრანგული დაგროვებითი პენსიიდან საქართველოს პრეზიდენტმა სალომე ზურაბიშვილმა 34094 ევროს შემოსავალი მიიღო, რაც ყოველთვიურად 2841 ევროს შეადგენს.

სწორედ ფრანგული პენსიის იმედად თქვა თავის დროზე სალომე ზურაბიშვილმა უარი საქართველოს პრეზიდენტის ხელფასზე.

„ვინაიდან პრეზიდენტის სარეზერვო ფონდი უკვე გაუქმდა, მე გადავწყვიტე, მოვნახო ფორმები ქველმოქმედების, ნოვაციის ხელშეწყობის. მე მგონი, ეს აუცილებელია. პრეზიდენტი უნდა იყოს ერთგვარი მფარველი ამ ქმედებების - ჩვენ ჯერ კიდევ ვმუშაობთ ამ იურიდიულ ფორმაზე, რომ კერძო საწყისზე შეიქმნას ფონდი ჩემი ეგიდით და საზოგადოების წარმომადგენლების დახმარებით. სადაც პირველ რიგში მე და იმედი მაქვს, სხვებიც მომყვებიან, გადავრიცხავ ჩემს ხელფასს. რამეთუ მე ვიღებ საფრანგეთიდან ჩემს დაგროვილ პენსიას, რაც მეყოფა სრულებით. ასე რომ, შემიძლია, ჩემი პრეზიდენტის სარგო მოვახმარო იმ საქმეებს, რასაც ერთად გადავწყვეტთ, რომ არის მნიშვნელოვანი ქველმოქმედების ან რამე ინიციატივების მხრივ,“ - განაცხადა 2019 წლის იანვარში სალომე ზურაბიშვილმა.

პრეზიდენტმა 2022 წელს მთლიანობაში ხელფასის სახით 76560 ლარი აიღო (თვეში 6380 ლარი). პრეზიდენტის ბოლო დეკლარაციაში, რომელიც სალომე ზურაბიშვილმა 2023 წლის 26 იანვარს შეავსო, აღნიშნულია, რომ 2022 წელს პრეზიდენტმა ქველმოქმედებაში 17 130 ლარი დახარჯა, ხოლო საქველმოქმედო ფონდის საშუალებით 40 000 ლარი. როგორც ჩანს პრეზიდენტს ხელფასი გაეზარდა, რადგანაც წინა, 2021 წელს სალომე ზურაბიშვილს ხელფასის სახით 66240 ლარი აქვს ჩარიცხული.

რაც შეეხება პრეზიდენტის უძრავ ქონებას, სალომე ზურაბიშვილი წლებია საფრანგეთში, პარიზში 60 კვ.მ ფართის ბინას ფლობს. ასევე სალომე ზურაბიშვილის საკუთრებაშია მიწის ნაკვეთი თბილისი, კუფტინის ქუჩაზე, რომელზედაც აშენებულია საცხოვრებელი სახლი (126.33კვ.მ)