გაეროს გლობალური შეთანხმების საქართველოს ქსელის აღმასრულებელი დირექტორი, სალომე ზურაბიშვილი გაეროს გლობალური შეთანხმების გამგეობის წევრად და გლობალური ქსელების საბჭოს თავმჯდომარედ აირჩიეს.
„ჩემთვის დიდი პატივია გაეროს გლობალური შეთანხმების გამგეობის წევრად და მსოფლიო ქსელების საბჭოს თავმჯდომარედ არჩევა. ეს ჩვენი ქვეყნისთვისაც დიდი პატივია, ამასთან ერთად დიდი პასუხისმგებლობა, ვიყოთ მსოფლიოში ყველაზე მსხვილი კორპორაციული მდგრადობის პლატფორმის, გაეროს გენერალური მდივნის სპეციალური ინიციატივის, გამგეობაში და წარმოვადგენდეთ მსოფლიოს 64 ქვეყანის ქსელს. იმედი მაქვს, წვლილს შევიტანთ როგორც საქართველოში, ისე მსოფლიოში ბიზნეს სექტორის უფრო მდგრად მიდგომების, ადამიანისა და შრომის უფლებების, გარემოს დაცვის და კორუფციასთან ბრძოლის მიმართულებით, ასევე მივაღწევთ ბიზნესის კიდევ უფრო აქტიურ ჩართულობას გაეროს მდგრადი განვითარების დღის წესრიგის შესრულებაში“,- განაცხადა სალომე ზურაბიშვილმა.
გაეროს გლობალური შეთანხმების გამგეობაში 21 წევრია - გაერთიანებული ერების, მულტინაციონალური საწარმოებისა და საერთაშორისო ორგანიზაციების ხელმძღვანელი პირები. მათ შორის: გაეროს გენერალური მდივანი, შრომის საერთაშორისო ორგანიზაციის გენერალური დირექტორი, საერთაშორისო გამჭვირვალობის თავმჯდომარე, საერთაშორისო სავაჭრო პალატის გენერალური მდივანი, Schneider Electric-ის, Natura & Co-ს და სხვა საერთაშორისო საწარმოებისა და ორგანიზაციების ხელმძღვანელები.
გლობალური ქსელების საბჭო შედგება გაეროს გლობალური შეთანხმების ადგილობრივი ქსელების აღმასრულებელი დირექტორებისგან მსოფლიოს 64 ქვეყნიდან, გაეროს გლობალური შეთანხმების სათაო ოფისის (GCO) და გაეროს გლობალური შეთანხმების ფონდის ხელმძღვანელი პირებისგან.