დაზუსტებული მონაცემებით, საქართველოში განხორციელებული პირდაპირი უცხოური ინვესტიციების მოცულობამ 2021 წელს 1 241.8 მლნ. აშშ დოლარი შეადგინა, რაც 2020 წლის შესაბამის მაჩვენებელზე 2.1-ჯერ მეტია, ხოლო 2021 წლის წინასწარ მონაცემებზე 7.7 პროცენტით მეტი. როგორც “კომერსანტთან“ ეკონომისტი სოსო არჩვაძე აღნიშნავს, ის პროცესი რაც გამოწვეული იყო კოვიდპანდემიით და სამეწარმეო აქტივობის შემცირებით დასრულდა და ეს ბევრ მაკროეკონომიკურ ინდიკატორზე, მათ შორის პირდაპირი უცხოური ინვესტიციების დინამიკაზეც აისახა.
მისივე თქმით, ტრენდი პოზიტიური და აღმავალია და ეს ადასტურებს იმას, რომ სამეწარმეო აქტივობა და ქართული ბიზნესისადმი ნდობა იზრდება.
„სხვათა შორის მართალია სტატისტიკის ეროვნულმა სამსახურმა ახლა გამოაქვეყნა გასული წლის დაზუსტებული მონაცემები, თუმცა ცოტა ხნით უფრო ადრე გამოქვეყნდა პირველი კვარტლის მონაცემები, სადაც საგრძნობი ზრდა იყო წინა წლის შესაბამის პერიოდთან შედარებით, ტრენდი აღმავალი და პოზიტიურია და ეს ადასტურებს იმას, რომ ზოგადად სამეწარმეო აქტიურობა იზრდება და მეორეს მხრივ იზრდება ნდობა ქართული ბიზნესგარემოსადმი, მისი მდგრადობისა და პერსპექტივების გათვალისწინებით.
მართალია განხორციელებული ინვესტიციების მიხედვით პირველ ადგილს ფინანსური სექტორი იკავებს, მაგრამ საკმაოდ მაღალი წილი უკავია რეალურ სექტორში განხორციელებულ ინვესტიციებსაც, ეს არის იგივე ენერგეტიკა, ამუშავებული მრეწველობა, უძრავი ქონება და ა.შ. ეს ნიშნავს იმას, რომ ამ სფეროებში კვლავწარმოების ციკლი შედარებით ხანგრძლივია და როდესაც უცხოელი ინვესტორი გამოხატავს მზაობას და ამა თუ იმ სფეროში ახორციელებს ინვესტიციას, ეს ნიშნავს იმას, რომ ის ენდობა, აქვს გარკვეული იმედები, ოპტიმისტურად უყურებს საქართველოს ბიზნეს მდგომარეობას, პერსპექტივებს და არ ელოდება საფრთხეს, რომ მის მიერ განხორციელებულ კაპიტალდაბანდებას საფრთხე შეექმნება, ეს რეპუტაციული თვალსაზრისითაც ცალკე დამატებითი ბონუსია“ - აღნიშნა იოსებ არჩვაძემ
რაც შეეხება რეინვესტირების მაღალ მაჩვენებელს, იოსებ არჩვაძე აღნიშნავს, რომ ბიზნესმენებმა, რომლებმაც ალღო აუღეს საქართველოში ბიზნესის წარმოებას, ისინი თვლიან, საქართველოში საქმიანი ურთიერთობების გაგრძელება ნამდვილად ღირს.
„ამ მონაცემებს საერთო ჯამში თუ შევაფასებთ დადებითი და პოზიტიურია და დაველოდოთ უფრო გვიანდელი მაჩვენებლის გამოქვეყნებას, მათ შორის მეორე კვარტლის, რომელიც დარწმუნებული ვარ იქნება ასევე პოზიტიური“, - აღნიშნა იოსებ არჩვაძემ.
თაკო კვაჭანტირაძე