გასული საუკუნის 90-იანი წლების შემდეგ საქართველოში შობადობის ყველაზე დაბალი მაჩვენებელია. 2021 წელს ქვეყანაში 45,946 ბავშვი დაიბადა, შედეგად ბუნებრივმა მატებამ მინუს 13,960 შეადგინა. ეს ბუნებრივი მატების სტატისტიკის აღრიცხვის დაწყების ანუ 1994 წლის შემდეგ ყველაზე მძიმე შედეგია. როგორც სტატისტიკოსი სოსო არჩვაძე განმარტავს, შობადობის კლება მკვეთრად ნეგატიურ გავლენას ახდენს მედიანურ ასაკზე, რომელიც 38 წელს შეადგენს და  რეგიონში ყველაზე მაღალი მაჩვენებელია.

დემოგრაფიული სტატისტიკის მიხედვით, 30 წლის განმავლობაში ჩვენი ქვეყნის მოსახლეობა, გადატანითი და პირდაპირი მნიშვნელობითაც, 7 წლით დაბერდა.

მიიღე ინფორმაცია უფრო სწრაფად „კომერსანტის“  Telegram-ზე.

,,შობადობის შემცირება, რა თქმა უნდა, მოქმედებს საქართველოს მოსახლეობის დაბერების პროცესზე. მედიანური ასაკი უკვე 38 წელა, რაც საკმაოდ მაღალი მაჩვენებელია. 30 წლის წინ, როცა საბჭოთა კავშირი იშლებოდა, მედიანური ასაკი იყო დაახლოებით 31 წელი. 3 ათწლეულის მანძილზე საქართველოს მოსახლეობა, პირდაპირი და გადატანითი მნიშვნელობით, 7 წლით დაბერდა და ამ მაჩვენებლით სამხრეთ კავკასიაში საქართველოს მოსახლეობა ყველაზე ხანდაზმულად ითვლება. ჩვენ გასულ წელს გვქონდა ბუნებრივი მატების დადებითი ნიშნული ისეთ რეგიონებში, როგორიც არის  გურია, იმერეთი, შიდა ქართლი და მცხეთა-მთიანეთი, მაგრამ ამ რეგიონებმა ამინდი ვერ შეცვალეს. მათი წილი  ქვეყნის მოსახლეობასა და ბუნებრივ მატებაში საკმაოდ მოკრძალებულია. მიუხედავად ამისა,  ამ რეგიონებში დაბადებულთა რაოდენობა სჭარბობდა გარდაცვალებას და ეს მცირე პოზიტივად შეიძლება მივიჩნიოთ დემოგრაფიულ ჭრილში“, - ამბობს არჩვაძე ,,კომერსანტთან“.

როგორც სტატისტიკოსი აღნიშნავს,  საქართველოში დაბალი შობადობა ომიანობის წლებში,  შემდეგ უკვე  1993-1995 წლებში იყო. აღნიშნულ პერიოდში აფხაზეთიდან დევნილ მოსახლეობაში 5-ჯერ დაბალი შობადობა ფიქსირდებოდა, ვიდრე საშუალოდ საქართველოში.

,,სტრესი, ეკონომიკური ვითარება, სიდუხჭირე, პირდაპირ გავლენას ახდენს შობადობის მაჩვენებელზე. ამიტომ სახელმწიფოს ზრუნვის ერთ-ერთ ქვაკუთხედს უნდა წარმოადგენდეს სოციალური სტაბილურობა,  დახმარება, მხარდაჭერა ახალშექმნილ ოჯახებს და ის სოციალური დახმარება, რომელიც ხელს უწყობს სტაბილურობას, მდგრადობას და დემოგრაფიული სიტუაციის გაუმჯობესებისათვის ხელსაყრელი პირობების შექმნას.

დაბადებულთა და გარდაცვალებულთა შორის გარღვევა 14 000-ს შეადგენს, რაც უმძიმესი სტატისტიკაა. ასეთი პროცენტული გარღვევა ჩვენ არ გვქონია თუნდაც მაშინ, როცა დაბალი შობადობა იყო, მაშინაც ფიქსირდებოდა ძალიან დაბალი ბუნებრივი მატება.  გარდაცვალებულთა და დაბადებათა რაოდენობაში სხვაობა თითქმის ნულოვან დონეზე იყო 2000-იანი წლების დასაწყისი, მაგრამ შემდეგ მდგომარეობა ნელ-ნელა სწორდებოდა, მაგრამ კოვიდპანდემიამ დრამატულ ფორმატში გადაიტანა დემოგრაფიული ცხოვრების პარამეტრები, მათ შორის დაბადების მაჩვენებელი“, - აცხადებს სოსო არჩვაძე.

,,საქსტატის“  მიხედვით, 2021 წელს საქართველოში 45 946 ბავშვი დაიბადა, შედეგად ბუნებრივმა მატებამ მინუს 13 960 შეადგინა.

აღნიშნულ პერიოდში  ქვეყანაში 59 906 ადამიანი გარდაიცვალა.

2021 წლის პირველი იანვრის მდგომარეობით, საქართველოს მოსახლეობის რაოდენობა სულ 3 688 600-ს შეადგენს.

მარი ჩიტაია