სოფლის მეურნეობის სამინისტროსთან თითქმის ყოველდღიური შეხვედრა გვაქვს, თუმცა სამწუხაროდ პოზიციების დაახლოება ამ დრომდე ვერ მოხერხდა, — ამის შესახებ „კომერსანტს“ ხორბლისა და ფქვილის მწარმოებელთა ასოციაციის დირექტორი ლევან სილაგავა ესაუბრა.

მისი თქმით, გარემოს დაცვისა და სოფლის მეურნეობის სამინისტროს ხელმძღვანელობასა და ხორბლისა და ფქვილის მწარმოებელთა ასოციაციას შორის შეხვედრა გუშინაც შედგა, სადაც არსებულ პრობლემებზე იმსჯელეს, მაგრამ ვერ შეთანხმდნენ.

„ჩვენ შევთავაზეთ ჩვენი ხედვა, მაგრამ გვაქვს განსხვავებული პოზიცია სამინისტროსა და ასოციაციას. სამინისტროს და მთავრობას მიაჩნია, რომ წისქვილკომბინატების ამუშავების შემთხვევაში ქვეყანაში პურის გაძვირების რისკი ვერ დაიზღვევა. ჩვენ კი ვთავაზობთ პროგრამას, რომლის მთავარ მიზანს პურის ფასის შენარჩუნების გარანტია წარმოადგენს და ასევე მისაღებია როგორც სახელმწიფოსათვის, ისე წისქვილკომბინატების, პურის მწარმოებელი ინდუსტრიის, ფერმერების და მოსახლეობისათვის.

რამდენიმე დღის წინ მეპურეებიც გამოვიდნენ და განაცხადეს, რომ პურის ფასთან დაკავშირებით არანაირი რისკი არ არსებობს და თუ ეს რისკი იარსებებს ჩვენი პროგრამის მიხედვით მოხდება გადაზღვევა. მეორეს მხრივ ფერმერებმა განაცხადეს, რომ პრობლემა აქვს სამუშაოების დაწყების, ამ პროგრამით ჩვენ მზად ვართ ჩავიბაროთ მოსავალი და ეს პრობლემაც მოვაგვაროთ, შეთავაზება გვაქვს თუმცა წინ ვერ მივდივართ“, - აღნიშნა ლევან სილაგავამ.

სოფლის მეურნეობის სამინისტროში „კომერსანტს“ განუცხადეს, რომ ამ თემაზე მუშაობა აქტიურად მიმდინარეობს, თუმცა დამატებით დეტალებზე საუბრისგან თავს იკავებენ.

საქართველოს ხორბლისა და ფქვილის მწარმოებელთა ასოციაციის შეთავაზება მთავრობას შემდეგ საკითხებს გულისხმობს:

„დაწესებულ იქნას დამაბალანსებელი საიმპორტო მოსაკრებელი იმპორტირებულ ფქვილზე, რაც გაათანაბრებს ფქვილისა და ხორბლის იმპორტის საგადასახადო რეჟიმებს.

ფქვილის იმპორტზე დამაბალანსებელი მოსაკრებლის შემოღების შემთხვევაში წისქვილკომბინატები შეძლებენ მუშა პროცესის აღდგენას და იღებენ შემდეგ ვალდებულებებს:

1. წისქვილკომბინატების მიერ ე.წ. „მასობრივი მოხმარების“ პურზე ფასის გარანტირებულ შენარჩუნებას.

2. ადგილობრივი ფერმერებისაგან 2022 წლიდან დარჩენილი ჩაუბარებელი ხორბლის მოსავლის გარანტირებული შესყიდვას ხარისხების შესაბამის ფასად (დღეს წისქვილების გაჩერების ფონზე , ხორბლის შესყიდვის შეთავაზებული ფასი საერთოდ არ არსებობს) -რაც უზრუნველყოფს შეჩერებული საგაზაფხულო სამუშაოების დაწყებას.

3. ქვეყანის სასურსათო უსაფრთხოების უზრუნველყოფას ( ხორბლით 2 თვიანი გარდამავალი მარაგების შექმნით).

ზემოაღნიშნული შეთავაზება პროცესში ჩართულ ყველა მხარეს აძლევს შემდეგ დადებით ეფექტს:

1. ფქვილის იმპორტიორებსა და ადგილობრივ წისქვილკომბინატებს ეძლევათ მუშაობის საშუალება გათანაბრებულ კონკურენტულ გარემოში.

2. მოსახლეობის ფართო ფენებისათვის გარანტირებულია ე. წ. „ მასობრივი მოხმარები“ პურის ფასი.

3. ნარჩუნდება წისქვილკომბინატებში მომუშავე 3000-მდე ადამიანის სამუშაო ადგილები.

4..უზრუნველყოფილია ადგილობრივი ფერმერების მიერ 2022 წლის ადგილობრივი დარჩენილი ხორბლის მოსავლის რეალიზაცია და 2023 წლის საგაზაფხულო სამუშაოების დაწყება ,შემდგომი წლების ხორბლის მოსავლის ზრდის მოტივაცია და ადგილობრივი მოსავლის გარანტირებული ჩაბარება წისქვილკომბინატებში.

5. უზრუნველყოფილია ქვეყნის სასურსათო უსაფრთხოება. გარანტირებულია ხორბლით 2 თვიანი გარდამავალი მარაგების არსებობა.

6. უზრუნველყოფილია უახლოეს წლებში საქართველოს მთავრობის მიერ დაანონსებული სტრატეგიით ადგილობრივი ხორბლის მოსავლის თვითუზრუნველყოფის მაჩვენებლის ზრდა.

7. სახელმწიფოსაგან სიტუაციის დასაბალანსებლად არც წისქვილკობინატების და არც ფერმერების მიერ არ მოითხოვება საბიუჯეტო თანხები მათ შორის არც რაიმე სახის სუბსიდირება, არამედ პირიქით ბიუჯეტი ივსება, როგორც ფქვილზე საიმპორტო გადასახადის მოსაკრებლით, ასევე ადგილობრივი წისქვილკომბინატების სტაბილური მუშაობის შედეგად გადახდილი გადასახადებით“.

შეგახსენებთ, „საქართველოს მარცვლის მწარმოებელთა ასოციაციის” თავმჯდომარემ ნიკოლოზ ბენიაიძემ განაცხადა, რომ 40-50 000 ტონა ხორბალი დასაწყობებულია და ფუჭდება.

მისი თქმით, ფერმერებმა გასულ წელს მთავრობის რეკომენდაციით ხორბლის მოსავალი გაზარდეს, თუმცა მოწეულ ხორბალს წისქვილკომბინატების დახურვის გამო ვეღარ ყიდიან და საწყობებში უფუჭდებათ.

არსებული ინფორმაციით, დღეს მორიგი შეხვედრა იგეგმება სოფლის მეურნეობის სამინისტროსა და სექტორის წარმომადგენლებს შორის.

„კომერსანტი“ თემაზე მუშაობას აგრძელებს.