კომპანია „არსის“ გენერალური დირექტორი ბესო ორთოიძე მშენებლობის ღირებულების ინდექსის ზრდას რამდენიმე ფაქტორს უკავშირებს. როგორც „კომერსანტთან“ „არსის“ ხელმძღვანელმა განაცხადა, სამშენებლო სექტორში მოთხოვნა მაღალია და მოთხოვნის ზრდის ფონზე იზრდება დასაქმებულთა ხელფასებიც.

„ფასები წლის განმავლობაში იზრდებოდა და მშენებლობის ნაწილში კადრები საკმაოდ დეფიციტური იყო. კადრების დეფიციტმაც ავტომატურად მოახდინა ხეფასების ზრდა. შეგვიძლია ვთქვათ, რომ ორივე ფაქტორმა შედეგზეც  იქონია გავლენა“, - აცხადებს ორთოიძე.

მისი განმარტებით, წლის ჭრილში სექტორი საკმაოდ გაიზარდა.

„თუ შევხედავთ უძრავი ქონების ფასებს, ფასები მზარდია. რაც იმას ნიშნავს, რომ დროთა განმავლობაში ფასების ზრდასთან ერთად იზრდება შრომის ანაზღაურებაც. ვარაუდობთ, რომ შრომის ანაზღაურების ზრდა  2023 წელსაც გაგრძელდება, თუმცა შედარებით დაბალი ტემპით“, - განმარტავს „არსის“ ხელმძღვანელი.

ორთოიძე კადრების დეფიციტის მიზეზებზეც საუბრობს და განმარტავს, რომ სამშენებლო სექტორში ზოგადად პროფესიული სასწავლებლების ნაკლებობაა.

„ქვეყანაში, ვინც მშენებლობის დარგში არის დასაქმებული, ეს ადამიანები ძირითადად თვითნასწავლები არიან და ასე პროფესიად არავინ არ ირჩევს.

თუ სხვა სექტორებს შევადარებთ, ამ სექტორში ანაზღაურება საკმაოდ მაღალია. უბრალოდ პოპულარული არაა, რომ ახალგაზრდა ადამიანი ისეთ პროფესიას დაეუფლოს, რომელიც მშენებლობაზე კონკრეტული ხელობით დაასაქმებს. როდესაც ადამიანი დაამთავრებს კონკრეტული მიმართულებით სასწავლებელს და სამსახურს ვერ იპოვის, ამის მერე იწყებს ფიქრს პროფესიას დაეუფლოს და დასაქმდეს მშენებლობაზე. ეს არის დღეს არსებული პრაქტიკა“, - აცხადებს ორთოიძე.

საქსტატის მონაცემების თანახმად, 2022 წლის ნოემბერში მშენებლობის ღირებულების ინდექსი წინა თვესთან შედარებით 0.8 პროცენტით გაიზარდა. აღნიშნული ცვლილება, ძირითადად, განპირობებული იყო მშენებლობის დარგში დაქირავებით დასაქმებულთა საშუალო თვიური ნომინალური ხელფასის 3.4 პროცენტიანი ზრდით, რამაც 0.44 პროცენტული პუნქტი შეიტანა ჯამური ინდექსის ცვლილებაში. ხოლო 2022 წლის თებერვალთან შედარებით მშენებლობის ღირებულების ინდექსი გაიზარდა 9.0 პროცენტით. დაქირავებით დასაქმებულთა საშუალო თვიური ნომინალური ხელფასის 16.5 პროცენტიანმა ზრდამ 3.21 პროცენტული პუნქტი შეიტანა ჯამური ინდექსის ცვლილებაში.