დიდი რაოდენობით სამხედრო ჯართი შესაძლოა, უკრაინელი მეტალურგებისთვის ნედლეულის ღირებული წყარო გახდეს. ამის შესახებ უკრაინის მეორადი ლითონის ასოციაციაში აცხადებენ, რასაც ადგილობრივი „ნოვოე ვრემია“ ავრცელებს.
ასოციაციის ექსპერტთა და სამეცნიერო საბჭომ, პარტნიორებთან ერთად, სამხედრო ტექნიკის უტილიზაციით მიღებული ჯართის პოტენციური მოცულობის გამოსათვლელად მეთოდოლოგია შეიმუშავა. კვლევებმა აჩვენა, რომ რუსებისთვის წართმეული ტექნიკის შესაძლო უტილიზაციის შედეგად, ლითონის ჯართის სტრუქტურა ფორმირდება ტანკებისგან (30% -მდე), ქვეითთა ტრანსპორტირების ჯავშანტექნიკისგან (40% -მდე), სხვადასხვა დანიშნულების საავტომობილო ტრანსპორტისა (15% -მდე) და ავიაციის ჩათვლით კიდევ სხვა ტექნიკისგან (15%-მდე).
26 აპრილის მდგომარეობით, უკრაინის სხვადასხვა რეგიონში (სუმის, ჩერნიგოვოს, ნიკოლაევისა და სხვა ოლქებში) სამხედრო ტექნიკისა და აღჭურვილობის დადასტურებული ჯამური მოცულობა, რომელიც შესაძლოა, ჯართის კატეგორიაში გადავიდეს, 18-20 ათას ტონად შეფასდა.
ჯართის ყველაზე გავრცელებული, თუმცა, ამავე დროს, „პრობლემური" ტიპი ჯავშანტექნიკის განადგურების შედეგად წარმოქმნილი მეტალია. ასეთი აღჭურვილობა 75-80%-ით მაღალი შენადნობის ფოლადის კლასისგან შედგება, რომელსაც წარმოებისა და დამუშავების საკუთარი სპეციფიკა აქვს. ომის დაწყებამდე უკრაინაში ასეთი ფოლადის ჯართი ერთ მეტალურგიულ საწარმოში ან სამხედრო-სამრეწველო კომპლექსის საწარმოების ქარხნებში შეზღუდული რაოდენობით მუშავდებოდა. ამჟამად ეს საწარმოები შეზღუდული ფორმატით ფუნქციონირებენ. შესაბამისად, ასეთი ჯართის საჭიროება მინიმალურია.
მოქმედი კანონმდებლობის მიხედვით, განადგურებული ან დაზიანებული, მათ შორის მტრისთვის წართმეული სამხედრო ტექნიკა სახელმწიფო საკუთრებაა. მას თავდაცვის სამინისტრო ან უფლებამოსილი სტრუქტურები, მათ შორის უკრაინის შეიარაღებული ძალების სარემონტო დანაყოფები და „უკრობორონპრომის“ საწარმოები განკარგავენ. ასეთი ჯართის შემდგომი გამოყენება ან მისი გაყიდვაც სახელმწიფო დაწესებულებების კომპეტენციაში შედის.
ამასთან, უკრაინის ზოგიერთ რეგიონში სამხედრო-სამოქალაქო ადმინისტრაციამ შემგროვებელ პუნქტებს სამხედრო ჯართის მიღება აუკრძალა, რადგან იმისთვის, რომ, მაგალითად, ტანკი, ჯავშანმანქანა ან თვითმფრინავი გაყიდვადი ლითონის ჯართი გახდეს, საჭიროა არაერთი ტექნოლოგიური ოპერაციის ჩატარება. ეს არის ექსპერტიზა ფეთქებადობაზე, გაწმენდაზე, შესანახ ადგილზე გადაადგილებაზე. ყველაფერ ამას, ასევე, შემოწმებას, დაცვას, დაჭრას, დაშლასა და დახარისხებას ხშირად უკრაინის შეიარაღებული ძალების სარემონტო-აღდგენითი განყოფილებების სპეციალური აღჭურვილობა სჭირდება.
ამასთან, უამრავი განადგურებული ტექნიკა დასახლებისგან მოშორებულ ადგილებში, მინდვრებსა და ტყეებში მდებარეობს, ამიტომ სექტორის ერთ-ერთი რთული მხარე ლოგისტიკაა. ამრიგად, ასეთი „მოსამზადებელი“ ოპერაციების ჯამური ღირებულება მაღალია და ხშირად შესაძლოა, ჯართის ღირებულებას აღემატებოდეს.