იტალიაში ყველამ იცის - თუ სადმე არ შეიძლება ავად გახდომა - ეს სამხრეთ რეგიონ კალაბრიაში. თუ რამე სერიოზული ხდება, კალაბრიელები სამკურნალოდ ცენტრალურ და ჩრდილოეთ რეგიონებში ჩადიან.
ადგილობრივი ჯანდაცვის სავალალო მდგომარეობა როგორც ცხოვრების დაბალი დონით, ასევე კალაბრიული მაფიის „ნდრანგეტას“ უზარმაზარი გავლენით აიხსნება. ვითარებას ისიც არ ცვლის, რომ რეგიონის ჯანდაცვის სისტემას რომიდან გამოგზავნილი სპეცწარმომადგენელი მართავს რადგანაც, არც ერთი ადგილობრივი სპეციალისტის ნდობა არ შეიძლება.
ჯერ კიდევ მარტ-აპრილში, პანდემიის დასაწყისში, როდესაც კორონავირუსი ჩრდილოეთ იტალიაში ბობოქრობდა, ყველას ეშინოდა, რომ ინფექცია სამხრეთ რეგიონებსაც გადაედებოდა და ეს ნამდვილი კატასტროფა იქნებოდა.
თუმცა, უმკაცრესი ლოკდაუნის ფასად, ღარიბი, მოუწესრიგებელი და კორუმპირებული სამხრეთი - სიცილია, ნეაპოლი და კალაბრია - მასშტაბურ აფეთქებს გადაურჩა. მაგრამ ისინი მეორე ტალღასაც სრულიად მოუმზადებლები დახვდნენ.
კალაბრიის მხარის პროკურორის ნიკოლა გრატერის თქმით, კალაბრიული მაფია „ნდრანგეტა“ ჯანდაცვის და სამედიცინო აღჭურვილობის და წამლების შესყიდვის სისტემებში შეღწევას ცდილობს.
„ისინი სხვადასხვა თანამდებობებზე გამოცხადებულ კონკურსებში ერევიან, თავიან ახლობლებს და ნათესავებს სამსახურებში აწყობენ. ასევე ისინი ბიზნესის საქმეებში ერევიან. ეს პირველ რიგში მცირე და საშუალო ბიზნესს ეხება, რომელიც პანდემიის გამო უშემოსავლოდ დარჩა. მთავრობის მიერ გამოყოფილი თანხები ყველა ბიზნესს არ ეყოფა, თანაც, გამოყოფილი თანხები დიდი დაგვიანებით მოდის. ამ დროს გადამრჩენის როლში ნდრანგეტა გამოდის, რომელიც გაჭირვებაში მყოფ მეწარმეს სესხს აძლევს“ - ამბობს ის.
მაფიას კიდევ ერთი უპირატესობა აქვს სახელმწიფოსთან შედარებით - ის თავისუფალია მთავრობისთვის აუცილებელი ბიუროკრატიული პროცედურებისგან. შედეგად, რაც უფრო მეტად აგვიანებს სახელმწიფო, მით უფრო მეტი ბიზნესი ნდრანგეტას კონტროლს ქვეშ გადადის.
„როგორც წესი, ეს სამევახშეო სესხს წააგავს - პროცენტი ძალიან მაღალია და ვალის დაბრუნება სულ უფრო და უფრო რთულდება, საბოლოოდ კი ეს ექსპერიმენტი გაკოტრებით სრულდება. ამ დროს კომპანია ფორმალურად პატრონის მფლობელობაში რჩება, თუმცა, რეალურად ბიზნესი უკვე მაფიას ეკუთვნის. ასეთი რამ ადრეც ხშირად ხდებოდა, თუმცა, დღეს ეს მოვლენა გაცილებით უფრო მასშტაბური და მასობრივი გახდა, ვიდრე 2019 წელს“ - ამბობს კალაბრიის პროკურორი.
კიდევ ერთი პრობლემაა - თვითდასაქმებულები, რომლებიც სახელმწიფოსგან დახმარების გარეშე დარჩნენ. მათ დიდ ნაწილს დახმარების მიღება მაფიისგან მოუწია.
„თუ სახელმწიფო ამ ადამიანებს არ უპატრონებს, ამას მაფია გააკეთებს და ისინი განგსტერების მოვალეები გახდებიან. „ნდგრანგეტას“ კი ძალიან კარგად შეუძლია მევალეების დამორჩილება და გამოყენება“ - ამბობს ნიკოლა გრატერი.
მაფიოზებისთვის ასევე სარფიანი ბიზნესია ევროკავშირის ფონდებიდან იტალიისთვის გამოყოფილი ფინანსური დახმარების ათვისება.
„რა თქმა უნდა, ნდრანგეტა ამ ფულს ავტომატურად და პირდაპირ ვერ მიიღებს, თუმცა, მაფია ამ თანხების განაწილებაში და ათვისებაში აქტიურად მონაწილეობს - მაღალჩინოსნების მოსყიდვით, ტენდერებში მათ მიერ დაარსებული კომპანიების მონაწილეობით, პირდაპირი თაღლითობით, და სხვა სქემებით. საბოლოო ჯამში, მაფია იტალიაში ერთად -ერთი სტრუქტურა იქნება, რომელიც პანდემიიდან გაძლიერებული გამოვა“ - მიიჩნევს პროკურორი.
kommersant.ru
მოამზადა თენგიზ აბლოთიამ