სამხრეთ ოსეთის დე ფაქტო რესპუბლიკა რუსული ღვინის საექსპორტო ბაზრებს შორის მეორე ადგილზეა და ჩინეთს უსწრებს. ამის შესახებ ფედერაციის სოფლის მეურნეობის სამინისტროსთნ არსებული სახელმწიფო შესყიდვების ცენტრის, „აგროექსპორტის“ გასული წლის მონაცემებში წერია, რასაც РБК ავრცელებს.

უწყების ცნობით, გასულ წელს რუსული ყურძნის ღვინის ექსპორტი, 2020 წელთან შედარებით, ნატურალურად 25%-ით, 642,1 ათას დეკალიტრამდე (1 dal=10 ლიტრს), ხოლო ფინანსურად 34%-ით, 13,3 მლნ დოლარამდე გაიზარდა.

გაყიდვების ძირითად ბაზრებად „აგროექსპორტი“ მეზობელ ქვეყნებს ასახელებს, რომელთა წილმაც, ფინანსური თვალსაზრისით, მიწოდების 67% შეადგინა. აღსანიშნავია, რომ 2021 წელს რუსული ღვინის მთავარი მყიდველი უკრაინა იყო, ვისთანაც ამჟამად სრულმასშტაბიან საომარ მოქმედებებს ეწევა. უკრაინაში გასულ წელს რუსეთმა 322 ათასი დეკალიტრი, ანუ 5,1 მლნ დოლარის ღვინო გაყიდა, მეორე ადგილზე სეპარატისტული „სამხრეთ ოსეთი“ სახელდება, სადაც 52 ათასი დეკალიტრი, 1,6 მლნ დოლარის რუსული ღვინო გაიყიდა, მესამეზე კი ჩინეთია, 61 ათასი დეკალიტრ მოცულობითა და 1,2 მლნ დოლარის გაყიდვებით.

როცა ე.წ. სამხრეთ ოსეთის ბაზარი ჩინეთს უსწრებს, გამოდის, რომ რუსულ ღვინოს ექსპორტში ჩავარდნა ომამდეც ჰქონდა. წელს, მითუმეტეს, სანქციების ფონზე, რუსული ღვინის ექსპორტი, თითქმის გაჩერებულია და შედარებით მეტი მოცულობა კვლავ სეპარატისტულ რეგიონებში, ოღონდ, ამჯერად ლუგანსკისა და დონეცკის ე.წ. სახალხო რესპუბლიკებში შედის. „აგროექსპორტის“ მონაცემებით, წელს ცქრიალა ღვინის გაყიდვები უცხოურ ბაზრებზე მხოლოდ რამდენიმე მილიონ ლიტრს შეადგენს, რაც წარმოების მთლიანი მოცულობის, დაახლოებით, 1,5%-ია.

აქედან მიწოდების ნახევარი ლუგანსკისა და დონეცკის ე.წ. სახალხო რესპუბლიკების წილია. ამასთან, სანქციებით გამოწვეული იმპორტის შემცირების გამო, სოფლის მეურნეობის სამინისტრო იძლებულია, ექსპორტის ნაცვლად, პრიორიტეტად შიდა ბაზრის დაკმაყოფილება გამოაცხადოს. უწყების წყაროს ცნობით, რუსეთში წარმოებული ყურძენი ღვინის ბაზრის მხოლოდ 50%-ს აკმაყოფილებს, დანარჩენს კი სანქციებამდე იმპორტირებული მზა პროდუქტი შეადგენდა. დღეს, როცა იმპორტირებული ღვინო აღარ არის საკმარისი, სამინისტრო ყველა რესურსს რუსების შიდა მოთხოვნილებების დასაკმაყოფილებლად მიმართავს.

„რა გვეექსპორტება?! არავინ იფიქროს, რომ ჩვენი ღვინით ჩინეთსა და აფრიკას „დავტბორავთ“. ეს გრძელი პროცესია, რაც შესაძლოა, ათწლეულობით გაგრძელდეს. ჩვენს ღვინოს ჩინეთსა და აფრიკაში არავინ ელოდება. მაგალითად, ჩინეთში მისი მოხმარება უკვე ხუთი წელია, მცირდება და ღვინისადმი ინტერესის პიკი ქვეყანაში უკვე გადავიდა, ხოლო აფრიკა დასავლურმა სამყარომ ლუდის კონტინენტად აქცია“, - აცხადებს ალკოჰოლის ფედერალური და რეგიონული ბაზრების კვლევის ცენტრის დირექტორი, ვადიმ დრობიზი.

ფედერაციის სოფლის მეურნეობის სამინისტრო რუსული ღვინის ექსპორტის განვითარებისთვის გამოსავლად მხოლოდ კონკურსის გამოცხადებას მიიჩნევს. ცენტრ „აგროექსპორტის“ კონტრაქტორმა, რომელიც კონკურსით უნდა გამოვლინდეს, ღვინის პროდუქტების უცხოური ბაზარი უნდა შეისწავლოს და ექსპორტისთვის სამიზნე ქვეყნები განსაზღვროს. კონკურსში გამარჯვებული 5 აგვისტოს გამოვლინდება, რომელსაც დოკუმენტზე სამუშაოდ 120 დღე ექნება. სამუშაოს შესრულებისთვის, უწყება მას სასტარტო თანხად 36 მლნ რუბლს (652 185 დოლარს) სთავაზობს.

წყარო: bpn.ge