რა ხდება უძრავი ქონების ბაზარზე და რა ტენდენციებით გამორჩეოდა 2022 წელი, ამ და სხვა თემებზე რადიო „კომერსანტის“ გადაცემაში, „კომერსანტის დილა“ TBC Capital - ის უფროსმა ასოცირებულმა მკვლევარმა გიორგი მჟავანაძემ ისაუბრა. მისი თქმით, ოქტომბერი დადებითი ტენდენციებით გამოირჩეოდა და წინა წლის ანალოგურ პერიოდთან შედარებით, ტრანზაქციები ანუ ბინების გაყიდვები 34% - ით არის გაზრდილი. რაც შეეხება გასაყიდ ფასს, გიორგი მჟავანაძის თქმით, ბინების გასაყიდი ფასების წლიური მაჩვენებელი 28% - ით არის გაზრდილი, ხოლო ბინების გაქირავების მაჩვენებელში 120% - იანი ზრდა შეინიშნება.
„ჩვენ, ჩვენი პროგნოზით ვვარაუდობთ, რომ ფასების ზრდა მომავალ წელსაც გაგრძელდება და ბოლოსთვის დასტაბილურება, ხოლო 2024 წლიდან ბაზარზე კლების მიმართულებით გარკვეული კორექცია იქნება, ამიტომ ნებისმიერი ინვესტორმა, რომელიც ინვესტიციებს ამ სექტორში ახორციელებს, ეს უნდა გაითვალისწინოს.
რაც შეეხება ზრდას, როგორც ქირა, ისე გაყიდვა, ერთმანეთთან მიბმულია, ჩვენ წელს ველოდებით, რომ ფასები წინა წელთან შედარებით საშუალოდ 15% - ით გაიზრდება და 2023 წელს კიდევ დამატებით 18% - იანი ზრდა გვექნება, თუმცა ქირის ფასში ბევრად უფრო მაღალი ზრდაა.
როდესაც ქირა ასე მნიშვნელოვნად არის გაზრდილი, სწორედ ეს იწვევს უძრავი ქონების მომგებიანობის ზრდას, ანუ ბინების შეძენა ბუნებრივად უფრო შემოსავლიანი ხდება, რაც გაყიდვის კუთხით მოთხოვნას ზრდის. სანამ გაქირავების ფასი არ დაკორექტირდება, გასაყიდი ბინების ფასის ზრდა გაგრძელდება“, - აღნიშნა გიორგი მჟავანაძემ.
მჟავანაძის თქმით, ბინებზე ფასი ყველა უბანში იზრდება. რაც შეეხება ბინების გაქირავებას, გიორგი მჟავანაძე ამბობს, რომ ოქტომბერში გასაქირავებელი ბინის ფასი გაიზარდა ყველა უბანში, გარდა მთაწმინდისა.
„რაც შეეხება მეორად და ახალ აშენებულ ბინებს, დღეის მდგომარეობით, მოთხოვნა ბევრად უფრო მაღალია მეორად ფართებზე, ისტორიულად ბაზარზე მეორადი უძრავი ქონების წილი 70% - ია , ეს ტენდენცია წელსაც გაგრძელდა და კიდევ უფრო გამძაფრდა, რადგან ქირაზე მოთხოვნა ძალიან დიდია“, - აღნიშნა გიორგი მჟავანაძემ.
მჟავანაძემ ახალი ბინების ფასებზეც ისაუბრა და განმარტა, რომ სამშენებლო მასალების ფასები საკმაოდ გაზრდილია და ეს ტენდენცია მხოლოდ ომის ეფექტი არ არის. მისი თქმით, სამშენებლო მასალაზე ფასების ზრდა 2019 წლიდან დაიწყო და მას შემდეგ დაახლოებით 50%-ით არის გაძვირებული, რაც მთლიან ბაზარზე ახდენს ზეგავლენას.
„ჩვენ ვხედავთ, რომ ეს ტენდენცია და სამშენებლო მასალების ფასის ზრდა, არა მხოლოდ ახალ ბინებს, არამედ ძველ აშენებულ ბინებსაც ეხება. ჩვენ როდესაც ვაკვირდებით ფასების ცვლილებას, აქ დაახლოებით ერთნაირი ტენდენცია შეინიშნება, თუმცა გამომდინარე იქიდან, რომ მეორად ბინებზე წლიურ ჭრილში მოთხოვნა უფრო გაზრდილია, ფასებიც შესაბამისად სწორედ ამ ბინებზეა გაზრდილი,“ - აღნიშნა გიორგი მჟავანაძემ,.
თაკო კვაჭანტირაძე