რა უნდა გაკეთდეს ინფლაციის ტემპის მინიმიზაციისთვის? აკადემიკოსი ლადო პაპავა აცხადებს, რომ ინფლაციის ტემპის დასტაბილურება მთლიანად მიწოდების ჯაჭვების აღდგენაზეა დამოკიდებული.
„ის, რომ ჩვენ გვაქვს მაღალი ეკონომიკური ზრდა ეს არის ჩვენი ქვეყნის ლოკალური ეფექტი, ხოლო ის, რომ ინფლაციაა მაღალი ეს არის გლობალური მიზეზებით განპირობებული. ინფლაციის ზრდა გამოიწვია ჯერ კიდევ კოვიდ პანდემიის დროს მიწოდების გლობალური ჯაჭვების რღვევამ. შემცირდა მიწოდება გაიზარდა ფასები. ეს მოხდა მთელს მსოფლიოში. ამიტომ 2020 წელს მაღალი ინფლაცია იყო და 2021 წელს კიდევ უფრო მაღალი ინფლაცია. ახლა ამ გლობალური ჯაჭვების ახალი წყვეტა მოხდა, იმიტომ რომ ეს მიწოდების ჯაჭვები, რომელიც რუსეთზე გადიოდა, ბელარუსზე გადიოდა, უკრაინაზე გადიოდა ყველა გაჩერებულია. ამან გამოიწვია კიდევ უფრო ინფლაციის მატება. თანაც ნუ დაგვავიწყდება, რომ რუსეთი იყენებს ისეთ ბერკეტებს როგორიცაა ენერგეტიკა, როგორიცაა სურსათი. შემთხვევით არ გაჩნდა ისეთი ტერმინები როგორიცაა „ნავთობის ომის“, „სასურსათო ომი“, განაცხადა გადაცემაში „ბიზნესი რისთავი 2-ზე“ ლადო პაპავამ.
მისივე განმარტებით, რუსეთმა გააძვირა თავისი ხორბალი, მთელი რიგი ქვეყნების მიმართულებით ექსპორტი აკრძალა.
„ბუნებრივია ეს ფასებზე აისახება. იგივე ინსტრუმენტებით ცდილობს ნავთობის ომის წარმართვასაც. ცხადია ნავთობის ომის ქვეშ მარტო ნავთობი არ იგულისხმება, გაზიც შედის. ასე, რომ ამ ვითარებაში, ინფლაციამ მიიღო გლობალური ხასიათი და ამას სტატისტიკაც ადასტურებს. აშშ-დან დაწყებული მთელს მსოფლიოში, ჩვენს სამეზობლოში ნუ დაგვავიწყდება, რომ ყველაზე მაღალი ინფლაცია თურქეთში ფიქსირდება. რაც შეეხება უკრაინას და რუსეთს იქ, რომ მაღალი ინფლაცია იყოს გასაკვირი არაა, საომარი მოქმედებებია. თუმცა მაღალია ინფლაცია სომხეთშიც, აზერბაიჯანშიც. ეს გლობალური პრობლემაა.
ეკონომიკური ზრდის მიღწევა ჩვენს მთავრობაზე უშუალოდაა დამოკიდებული, რასაც ფაქტია, რომ წარმატებით ახერხებს. ინფლაცია გლობალურია, სანამ მიწოდების გლობალური ალტერნატიული ჯაჭვები არ შეიქმნება ინფლაცია დარჩება მაღალი“, აცხადებს ლადო პაპავა.
2022 წლის ოქტომბერში წინა თვესთან შედარებით ინფლაციის დონემ საქართველოში 0.5 პროცენტი, ხოლო წლიური ინფლაციის დონემ 10.6 პროცენტი შეადგინა.
საქსტატის მონაცემებით, რაც შეეხება საბაზო ინფლაციას, აღნიშნულმა მაჩვენებელმა 2022 წლის ოქტომბერში, გასული წლის შესაბამის პერიოდთან შედარებით 7.3 პროცენტი შეადგინა, ხოლო თამბაქოს გარეშე წლიური საბაზო ინფლაციის მაჩვენებელი ასევე 7.3 პროცენტით განისაზღვრა.