“ეს არის სისხლის სამართლის დანაშაული და ბოლომდე ჩავყვებით, პირადად მე ვიქნები დაინტერესებული, რომ სამაგალითოდ დაისაჯოს ეს კომპანია და კონკრეტული ადამიანები“, - ამის შესახებ თბილისის მერმა კახა კალაძემ თბილისი მუნიციპალიტეტის ორშაბათის სხდომაზე განაცხადა, რითაც სამშენებლო კომპანია “მონუმენტმშენის“ მიერ უკანონო მშენებლობის ფაქტს გამოეხმაურა. მისი თქმით, არის შემთხვევები, როდესაც თბილისში კონკრეტულ ადგილებში და კონკრეტულ უბნებში დღესაც ხვდება უკანონო მშენებლობებს და ეს კატეგორიულად მიუღებელია.
მიიღე ინფორმაცია უფრო სწრაფად „კომერსანტის“ Telegram-ზე.
“სანამ მე ამ ქალაქის მერი ვარ, სანამ ვხელმძღვანელობ თბილისი მთავრობას ჩემ თანამშრომლებთან ერთად, არასდროს დავუშვებთ უკანონო მშენებლობას და არასდროს არ დავუხრით თავს არც ერთ ასეთ ფაქტს, რომელიც იქნება გამოვლენილი.
გვაქვს კონკრეტული შემთხვევა, ისტორიულ უბანში, კერძოდ ამაღლების ქუჩაზე, სადაც ერთ-ერთი მშენებლობის დროს გამოვლინდა უკანონოდ სართულის დაშენება. სამუშაოს აწარმოებს კომპანია „მონუმენტმშენი“. როცა ასეთ გადაწყვეტილებას იღებ და უკანონო ამახინჯებ პროექტს, რომელიც შეთანხმებულია და ერთ სართულს კიდევ ამატებ, არ მინდა ვინმემ იფიქროს, რომ ვიღაც ამას გაუტარებს, ამას მოჰყვება მკაცრი რეაგირება და შეიძლება ეს იყოს ყველასთვის საჩვენებელი, თუ არსებული კომპანია ძალიან მალე არ მოაწესრიგებს არსებულ მშენებლობას. ეს არის სისხლის სამართლის დანაშაული და ბოლომდე ჩავყვები, მე ვიქნები დაინტერესებული, რომ ეს კომპანია და კონკრეტული ადამიანები სამაგალითოდ დაისაჯოს, თუ ეს შენობა არ იქნება მოყვანილი შესაბამისობაში“, - განაცხადა კახა კალაძემ.
„არავის დასჯას არ მივესალმები, მაგრამ ქალაქის აოხრებას და არასწორ ურბანულ განვითარებას არავის ვაპატიებთ. ჩვენ სწორედ იმიტომ აგვირჩია ხალხმა და იმიტომ გვაქვს ამხელა მხარდაჭერა, რომ ჩვენი ერთ-ერთი დაპირება სწორედ ქალაქის სწორი ურბანული განვითარება იყო. არავის გვსიამოვნებს ის, რაც წლების განმავლობაში ხდებოდა ამ ქალაქში, თუ როგორ დაამახინჯეს კონკრეტული არეალები კონკრეტულ რაიონებში. ამის გაგრძელება კატეგორიულად მიუღებელია. შესაბამისად, ასეთ ფაქტებზე იქნება ძალიან მკაცრი რეაგირება. ჩვენ გასულ წელს გამოვაცხადეთ ამნისტია. ასე ვთქვათ მასშტაბური პატიება, რადგან შეუძლებელი იყო ამ დარღვევების გამოსწორება და უკანონოდ აშენებული ფართებიდან ხალხის გამოსახლება. ეს გადაწყვეტილება მივიღეთ საქართველოს პარლამენტთან ერთად, ამავე დროს დავაწესეთ სისხლის სამართლის პასუხისმგებლობა, რომ მოგვეხდინა ასეთი დარღვევების პრევენცია. ამიტომ მინდა, კიდევ ერთხელ მოვუწოდო ამ კომპანიას, რაც შეიძლება სწრაფად მოახდინოს არსებული სივრცის დემონტაჟი და მშენებლობა მოიყვანოს პროექტთან შესაბამისობაში“, - აღნიშნა კახა კალაძემ.