რუსეთისთვის დაწესებული სანქციები პრობლემებს უქმნის ჩინეთის პროექტს, რომელიც ევროპაში ტვირთების სახმელეთო გადაზიდვებს გულისხმობს. ამის შესახებ The Wall Street Journal წერს.
გამოცემა ამ პრობლემას „$4–ტრილიონიან წარუმატებლობას“ უწოდებს.
მიიღე ინფორმაცია უფრო სწრაფად „კომერსანტის“ Telegram-ზე.
მიუხედავად იმისა, რომ ევროკავშირს რუსეთის ტერიტორიის გავლით სატრანზიტო იმპორტზე სანქციები არ დაუწესებია, რუსეთზე სარკინიგზო გადაზიდვები პრაქტიკულად გაყინულია, წერს გამოცემა ექსპორტიორი კომპანიების მონაცემებზე დაყრდნობით.
რუსეთი ჩინური პროექტის „ერთი სარტყელი – ერთი გზა“ ძირითადი ნაწილია, ამ ქვეყანაზე გადის სატრანსპორტო დერეფანი, რომელიც დიდ ბრიტანეთამდე აღწევს.
„რუსეთისთვის დაწესებული სანქციები სერიოზულ საფრთხეს უქმნის ჩინეთის ამბიციას ევროპაში ექსპორტის გაზრდასთან დაკავშირებით, რაც წარუმატებლობად აღიქმება ჩინეთის ლიდერის სი ძინპინის $4–ტრილიონიანი ძალისხმევისათვის“, – წერს The Wall Street Journal.
დღეს, უკრაინაში რუსეთის შეჭრის შემდეგ, ზოგიერთი ექსპორტიორი კომპანია რუსეთის ალტერნატიულ შესაძლებლობებს ყაზახეთისა და საქართველოს დერეფნებში ეძებს. ასევე, ბევრმა ევროპულმა და ჩინურმა კომპანიამ თავისი ტვირთები საზღვაო ტრანსპორტზე გადაამისამართა.
„აბრეშუმის გზაზე“ ტვირთბრუნვა 2021 წელს 24%–ით გაიზარდა. ეს ცვლილება პანდემიას უკავშირდებოდა, როდესაც ბევრი პორტი დაიხურა და სახმელეთო ტრანსპორტის მნიშვნელობა გაიზარდა. ასევე, ამ პროექტში ჩინეთი ბევრ ინვესტიციას ახორციელებდა როგორც რუსეთში, ისე ბელარუსში. თავის მხრივ, ამანაც შეუწყო ხელი ხმელეთზე მოძრაობის ზრდას.
დღეს კი, ჟურნალის ცნობით, ბევრი ლოგისტიკური კომპანია ამბობს უარს რუსეთთან თანამშრომლობაზე. თანაც, გერმანიის დუისბურგის პორტმა, რომელიც აბრეშუმის გზის კვანძია, გაავრცელა ინფორმაცია, რომლის თანახმად, საზღვაო დამზღვევები, დიდი ალბათობით, უარს იტყვიან რუსეთიდან და ბელარუსიდან შესული ტვირთების დაზღვევაზე.
პორტში იმასაც აღნიშნავენ, რომ რუსეთიდან კიდევ შედის ტვირთი, მაგრამ ამ ნაკადის შემცირებას ელიან.
მთლიანობაში, რუსეთ–უკრაინის ომის ჭრილში საკმაოდ საინტერესო ცვლილებები იკვეთება ჩინეთის უმნიშვნელოვანეს გეოპოლიტიკურ პროექტში, რაც მის ექსპორტს დამოკიდებულს გახდის დასავლეთის საზღვაო სახელმწიფოებზე, როგორებიცაა აშშ და დიდი ბრიტანეთი.