რუსეთში კიბორჩხალის წარმოება ექსპორტის შემცირების გამო შესაძლოა, შეწყდეს. კიბორჩხალის იმპორტზე აშშ-ის აკრძალვა ივნისის შუა რიცხვებიდან ამოქმედდება, თუმცა რუსი მრეწავები საზღვარგარეთ პროდუქციის გადაზიდვაში ჩამოშლილი ლოგისტიკის გამო სირთულეებს უკვე აწყდებიან.
„კომერსანტის“ მონაცემებით, რუსეთიდან კიბორჩხალის ექსპორტში შეერთებული შტატებისა და ევროკავშირის წილი, თითქმის, ნახევარია. კომპანიები ექსპორტისთვის გამოთავისუფლებული მოცულობის შიდა ბაზარზე გადამისამართებას ვერ ახერხებენ, რადგან რუსეთში გადამამუშავებელ ჭერაში ბუნებრივი დარიშხნის შემცველობაზე მკაცრი მოთხოვნებია, ხოლო აზიელ მომხმარებლებს ცოცხალი კიბორჩხალა სჭირდებათ, რომელსაც ყველა ექსპორტიორი ვერ უზრუნველყოფს.
„კომერსანტის“ შეფასებით, მწარმოებლები მხოლოდ ერთ გამოსავალს ხედავენ: რეწვა შეაჩერონ. გამოცემის მონაცემებით, უცხოური ბაზრების შეზღუდვის გამო, ზოგადად, მეთევზეობის მრეწველობას წელიწადში 4 მლრდ დოლარზე მეტი შემოსავლის დაკარგვა ემუქრება.
ბაზრის რამდენიმე მონაწილემ „კომერსანტს“ განუცხადა, რომ შეერთებულ შტატებსა და ევროკავშირში, რომელთა წილიც კიბორჩხალის ექსპორტის 48%-ია, მომპოვებლებს მიწოდებაში პრობლემები მარტში დაწესებული სანქციების შემდეგ შეექმნათ, იმის მიუხედავად, რომ სანქციები ძალაში 23 ივნისიდნა შედის. „კომერსანტის“ თანამოსაუბრეები განმარტავენ, რომ „ექსპორტი წინასწარ დადებული ხელშეკრულებებითაც კი შეუძლებელია, რადგან ლოგისტიკა ჩამოშლილია.“
მეთევზეობის ფედერალური სააგენტოს („როსრიბოლოვსტვოს“) მონაცემებით, 2021 წელს რუსეთში 96 ათასი ტონა, ხოლო იანვრიდან 23 მაისამდე 31,5 ათასი ტონა კიბორჩხალა იქნა მოპოვებული.
ჩრდილოეთის მეთევზეთა კავშირის მონაცმებით, ჩრდილოეთის აუზში მოპოვებული ცოცხალი კიბორჩხალის, თითქმის, 90% ექსპორტზე აშშ-ში გადის, ხოლო ევროკავშირს, პირველ რიგში, მოხარშულ-გაყინული პროდუქცია მიეწოდება. ჩრდილოეთ აუზის მრეწავებს, შორის ბაზრების გამო, არ აქვთ შესაძლებლობა, ცოცხალი კიბორჩხალა აზიაში გაგზავნონ.
ამჟამად მრეწავები იძულებული არიან, დაჭერილი კიბორჩხალის უმეტესი ნაწილი დაასაწყობონ, თუმცა ეს შესაძლებლობებიც შეზღუდულია. გარდა ამისა, ცოტა ხნის წინ მინტაიზე თევზაობის სეზონი დასრულდა, რომელიც, ასევე, ლოგისტიკური პრობლემების გამო საწყობებში დიდი მოცულობით გროვდება, ხოლო 1-ლი ივნისიდან ორაგულის სეზონი იწყება, რისთვისაც მრეწავებს, ასევე, მაცივრები დასჭირდებათ.
ბაზრის მონაწილეები არაოფიციალურად აცხადებენ, რომ აგვისტოდან კიბორჩხალის რეწვის შეჩერების გარდა, სხვა გზას ვერ ხედავენ.
„როსრიბოლოვსტვო“ ექსპორტის პრობლემას აღიარებს, თუმცა რეწვის გაყინვის რისკებს ვერ ხედავს. უწყებაში „კომერსანტს“ განუცხადეს, რომ კომპანიებთან ერთად ალტერნატიულ ბაზრებს ეძებენ.
სრულიად რუსეთის თევზის მწარმოებელთა ასოციაციაში ამბობენ, რომ ყველაზე არახელსაყრელი სცენარით, წყლის ყველა ბიოლოგიურ რესურსზე საექსპორტო ბაზრების შევიწროება მეთევზეობის ინდუსტრიას წელიწადში 4,3 მლრდ დოლარით აზარალებს.