,,სანტე ჯი-ემ-თი პროდუქტები" არ გეგმავს რუსეთის ბაზარზე რძის პროდუქტების ექსპორტს. ამის შესახებ კომპანიამ ოფიციალურ გვერდზე დაწერა.
ვეხმაურებით აქტუალურ თემას, რომელიც ქართული რძის პროდუქტების მწარმოებლებისთვის რუსეთის ბაზარზე ექსპორტის შეთავაზებას ეხება. “სანტე ჯი-ემ-თი პროდუქტები” არის უმსხვილესი რძის გადამამუშავებელი ქართული კომპანია, რომელიც 1997 წლიდან ოპერირებს ქართულ ბაზარზე. კომპანიის პრიორიტეტი და უპირველესი საზრუნავი ქართველი მომხმარებელია. ამ ეტაპზე კომპანია აქტიურად არის ჩართული უკრაინისთვის ჰუმანიტარული დახმარების გაწევის პროგრამებში.
პარალელურად კომპანია ადგილობრივ ბაზარზე მრავალ ინოვაციას გეგმავს და აქტიურად ემზადება იმპორტირებული პროდუქციის დეფიციტის შემთხვევაში ჩაანაცვლოს საქართველოში წარმოებული პროდუქტით, - განმარტავს კომპანია.
შეგახსენებთ, რომ რუსეთის ვეტერინარიისა და ფიტოსანიტარიის ფედერალური სამსახური (როსსელხოზნადზორი/Россельхознадзор) აცხადებს, რომ 15 ქართულ კომპანიას რუსეთში რძის პროდუქტების იმპორტის „ნებას რთავს“. როსსელხოზნადზორის ცნობით, ეს გადაწყვეტილება მიღებული იქნა უწყების ხელმძღვანელ სერგეი დანკვერტსა და საქართველოს სურსათის ეროვნული სააგენტოს ხელმძღვანელს ზურაბ ჩეკურაშვილს შორის მოლაპარაკების შემდეგ. სურსათის ეროვნული სააგენტო სოფლის მეურნეობის სამინისტროს ექვემდებარება. ეს გადაწყვეტილება ფიტოსანიტარიის სამსახურმა რუსეთისთვის არაერთი სახელმწიფოს მიერ დაწესებული მძიმე სანქციების ფონზე მიიღო.
ცნობისთვის, ქართული პროდუქციის ექსპორტის ზრდის მიზნით, რუსეთთან მოლაპარაკებებს ადასტურებს ქართული მხარეც. სურსათის ეროვნული სააგენტოს ცნობით, უწყება მოლაპარაკებებს აწარმოებს არაერთ ქვეყანასთან, მათ შორის, წარმატებით დასრულდა მოლაპარაკებები საუდის არაბეთთან, ხოლო 2020 წლიდან მოლაპარაკებები მიმდინარეობდა რუსეთის ფდერაციასთან, რომლის საფუძველზე, ქართული ცხოველური წარმოშობის პროდუქციის ექსპორტის დაშვებასთან დაკავშირებით გადაწყვეტილება იქნება მიღებული.
სურსათის უვნებლობის სააგენტო ამტკიცებს, რომ ინტენსიურად მიმდინარეობს მუშაობა სტანდარტებისა და რეგულაციების დანერგვასთან დაკავშირებით, რათა ქართული ცხოველური წარმოშობის პროდუქტების ექსპორტი შესაძლებელი გახდეს ევროკავშირის ქვეყნებში.
ქართველი რძის მწარმოებლები უარს ამბობენ რუსეთში ექსპორტზე.