საოჯახო მარანი Chavle (,,ჩავლე“) წარმოებას აფართოებს. მალე ,,საფერავთან“ ერთად გაყიდვაში ,,ქისის“ ღვინოც ჩაეშვება. პროდუქტი ახალგაზრდა მეწარმემ ლაშა ჩავლეშვილმა 14 მაისს მთაწმინდაზე გამართულ ახალი ღვინის ფესტივალზე წარადგინა და დიდი მოწონებაც დაიმსახურა.
საწყის ეტაპზე 1 ბოთლი ,,ქისის“ ფასი 30 ლარია. როგორც ლაშა ჩავლეშვილი ,,კომერსანტთან“ ამბობს, კომპანიას აქვს ჯანსაღი ამბიცია, მყარად დაიმკვიდროს ადგილი როგორც ქართულ ბაზარზე, ასევე ქვეყნის გარეთ და სწორება ევროპაზე ექნებათ.
მიიღე ინფორმაცია უფრო სწრაფად „კომერსანტის“ Telegram-ზე.
,,ჩვენი კომპანია ბაზარზე სულ ახლახან გამოჩნდა და ვცდილობთ, მალე მოვიპოვოთ პოპულარობა, რის გარანტიც წარმოებული პროდუქტის ხარისხი და დამზადების თანამედროვე ტექნოლოგიებია, რაც წარმოებაში დავამკვიდრეთ. შეიძლება ითქვას, ახლა ვყალიბდებით. ამ მხრივ წარმატებული სტარტი ,,ღვინის ფესტივალი 2022“ აღმოჩნდა, სადაც ჩვენს მიერ წარმოდგენილმა ,,ქისიმ“ დიდი მოწონება დაიმსახურა. ეს არის კლასიკურად დაყენებული ღვინო, რომლის ჩამოსხმა, დაყენება ფერმენტაცია ხდება კოჯორში, საოჯახო მარან ,,ჩავლეში“. ახალი პროდუქტის უპირატესობა ხარისხსა და გემურ თვისებებშია, რითაც ადგილწარმოშობის ეს ღვინო საქართველოში და ქვეყნის გარეთაც ძალიან პოპულარულია. აქცენტი უნიკალურ სახეობაზე ავიღეთ, რომელიც დიდი ხნის განმავლობაში მივიწყებული იყო და ისევ იმკვიდრებს ადგილს ქართული ღვინის ბაზარზე. დარწმუნებული ვართ, რომ სწორი არჩევანი გავაკეთეთ, რაშიც ქართველი და უცხოელი ღვინის მოყვარულების დარწმუნებას ძალიან მალე შევძლებთ“, - ამბობს ლაშა ჩავლეშვილი.
როგორც მეწარმე ამბობს, ამ ღვინოში წამყვანია მცენარეული არომატები, გარგარის და კომშის ტონები, მაღალალკოჰოლურია და დაძველების დიდი პოტენციალით გამოირჩევა.
რაც შეეხება საოჯახო მარან ,,ჩავლეს“, ორი დასახელების ღვინოს აწარმოებს - ,,საფერავი“ და ,,ქისი“. საოჯახო მარანი გამოირჩევა იმით, რომ თანამედროვე ელემენტებით არის დატვირთული, ტექნოლოგიურად დახვეწილია, აქვს გაგრილების ახალი სისტემა და ყველა საწარმოო პროცესი მაქსიმალურად კონტროლდება.
ამ ეტაპზე წამოება რამდენიმე ასეულ ბოთლს შეადგენს.
,,წლიდან წლამდე ვაპირებთ გაფართოებას, გვაქვს ამბიცია, ,,ქისი“ გახდეს ძალიან კარგი ღვინო ტურისტებისთვის, რომლებსაც ადგილზე ქართული მეღვინეობის გაცნობა სურთ. როგორც აღვნიშნე, საამისოდ ამ ღვინოს აქვს უზარმაზარი პოტენციალი. მას გააჩნია როგორც რქაწითელის, ასევე მწვანეს ბუნებრივი თვისებები, რაც ძალიან უნიკალურ და გამორჩეულ ჯიშად აქცევს. მსოფლიოსთვის მისი გაცნობა დიდ წარმატებას მოუტანს საქართველოს, რომელიც ღვინის უნიკალური სახეობებით მუდმივად ახერხებს წამყვანი ბაზრების ყურადღების მიქცევას და ,,ქისიც“ სწორედ ამ მიზნით შევარჩიეთ. ფესტივალით დავიწყეთ, ვემზადებით ახალი გამოწვევებისთვის და ველით გამოხმაურებას და აღიარებას“, - ამბობს ლაშა ჩავლეშვილი ,,კომერსანტთან“ საუბრისას.
საოჯახო მარანში საწყის ეტაპზე 20 000 დოლარის ინვესტიცია ჩაიდო. როგორც ახალგაზრდა მეწარმე ამბობს, ამ თანხით მათ საწარმოს გადაიარაღება და ტექნოლოგიურად დახვეწა შეძლეს.
ცნობისთვის, ქისი ქვევრის ღვინოა, რომელიც ძალიან მცირე რაოდენობით მზადდება და ერთი ბოთლი დაახლოებით 50-60 ლარი ღირს. ამ ღვინოს კახეთის რეგიონში, ახმეტის ზონაში წურავენ. ღვინო ექვსი თვის განმავლობაში ქვევრში უნდა დადუღდეს და მხოლოდ ამის შემდეგ ასხამენ ბოთლებში.
უსახელოურის და მუსკატის შემდეგ ქისი ძვირადღირებული ღვინოების ათეულში მესამე ადგილს იკავებს.
ვაზის ეს უნიკალური ჯიში, რომელიც თანდათან დავიწყებას ეძლეოდა, ქართული ღვინის სამყარომ რამდენიმე წლის წინ ხელახლა აღმოაჩინა. მანამდე მხოლოდ სოფელ მაღრანში მცხოვრებმა მევენახეებმა და მეღვინეობა-მევენახეობის სპეციალისტებმა იცოდნენ მისი არსებობის შესახებ.
როგორც სპეციალისტები აღნიშნავენ, სუფრის ღვინოების გარდა ქისიდან დგება მაღალი ღირსების ყურძნის უალკოჰოლო წვენი და ნაწილობრივ გამოსადეგია აგრეთვე, როგორც ადგილობრივი მოხმარების სასუფრე ყურძენი.
ქისი პერსპექტიულია აგრეთვე ბუნებრივად ნახევრადტკბილი, მაგარი და სადესერტო ღვინოების დასაყენებლად. ქისი რთველის ჩვეულებრივ ვადებში თავისუფლად აგროვებს 26% და მეტ შაქარს და აქვს ძლიერი ჯიშური არომატი, რომელიც ისევე საჭიროა დასახელებული ტიპის ღვინოებისათვის, როგორც მაღალი შაქრიანობა.
მარი ჩიტაია