საქართველოს პორტებში ტვირთების მიღება-გაცემის პროცესი შეიძლება დროებით შეჩერდეს. ეს იმ შემთხვევაში, თუ საომარი მოქმედებები შავ ზღვაზე გადაინაცვლებს, რის რისკიც დიდია. როგორც ,,სატრანსპორტო დერეფნის კვლევის ცენტრის" დირექტორი პაატა ცაგარეიშვილი ,,კომერსანტთან“ განმარტავს, საფრთხე ემუქრება საქართველოს სასურსათო უსაფრთხოებას, რაც შემდეგში დიდ პრობლემას გამოიწვევს.
,,კონფლიქტის შავ ზღვაზე გადანაცვლება უმძიმეს შედეგს მოიტანს. ბუნებრივია, ეს დააფრთხობს და შეაჩერებს საბორნე გადაზიდვებს, რომელიც სამკუთხედზე მოძრაობს: საქართველო-უკრაინა-ბულგარეთი. 4 საბორნე გემია (2 უკრაინული და 2 ბულგარული), რომლის მოძრაობა შეჩერდება. ეს დიდი ეკონომიკური დანაკარგი იქნება, ვინაიდან მთლიანად გაწყდება სავაჭრო კავშირი უკრაინისა და ბულგარეთის მიმართულებით. გადაზიდვები უკვე დამუხრუჭებულიცაა და ამის აღდგენას შემდეგ დიდი დრო დასჭირდება, თუნდაც მალე დასრულდეს ომი, რადგან პროცესი დაქოქილია, ესეც უკვე ნეგატიურ ფაქტორია“, - აცხადებს ცაგარეიშვილი.
გარდა საბორნე გადაზიდვებისა, იგი საკონტეინერო გადაზიდვების შეჩერების საფრთხეზეც საუბრობს.
,,საკონტეინერო გემები, რომლებიც შავი ზღვის ნავსადგურებზე მოძრაობენ, ძირითადად სტამბულის, საბერძნეთის და იტალიის ნავსადგურებიდან მოდიან. დიდი საკონტეინერო გემებიდან (დედა გემები) ფიდერულ (პატარა გემები) გემებზე ხდება ამ კონტეინერების გადმოტვირთვა. შესაბამისად, ამას საკონტეინერო ნაკადის გაჩერებაც მოჰყვება, რომელიც ჩინეთიდან და სხვადასხვა ქვეყნიდან მოდის. სავარაუდოდ, საკონტეინერო ნაკადიც გაჩერდება, რაც დიდი დარტყმა იქნება ჩვენი ეკონომიკისთვისაც, რადგან აქედან ვიღებთ პროდუქციას, ქვეყანა სასურსათო უსაფრთხოების დიდი რისკის წინაშეა“, - აცხადებს პაატა ცაგარეიშვილი ,,კომერსანტთან“.
შეგახსენებთ, რომ რუსეთმა 24 თებერვლის დილით რუსეთის პრეზიდენტმა პუტინმა დონბასისა და ლუგანსკის სეპარატისტული რეგიონების დაცვის საბაბით უკრაინაში სრულმასშტაბიანი ომი წამოიწყო.
მარი ჩიტაია