სახელმწიფო საწარმოების რეფორმის ფარგლებში საპარტნიორო ფონდის რეფორმაც მოხდება. ფონდის რეფორმა მთავრობამ დიდი ხანია დაანონსა, თუმცა ამ დრომდე კონკრეტიკა არ არსებობს.
როგორც ფინანსთა მინისტრის მოადგილე გიორგი კაკაურიძე ამბობს, რეფორმის ფარგლებში საპარტნიორო ფონდიდან საქართველოს რკინიგზა და სახელმწიფო ნავთობისა და გაზის კორპორაცია გამოვლენ, ხოლო თავად ფონდი ინვესტიციების ხელშეწყობით დაკავდება.
„საპარტნიორო ფონდი ბიუჯეტიდან აღარ დაფინანსდება და ის მსხვილი საწარმოები როგორიცაა საქართველოს რკინიგზა და სახელმწიფო ნავთობისა და გაზის კორპორაცია - ეს კომპანიები გამოვლენ საპარტნიორო ფონდიდან და იქნებიან იგივე სტატუსის მატარებლები, როგორც სხვა სახელმწიფო კომპანიები.
თვითონ საპარტნიორო ფონდი განსხვავებული მოდელით იმუშავებს, თუმცა მისი მთავარი მიზანი არ იცვლება - მიზანი ინვესტიციების ხელშეწყობაა და ამ კუთხით მან უკვე უნდა მოიზიდოს სხვა ინვესტორები რომლებიც მის აქტივებთან ერთად დამატებით რესურსს მოიტანენ ქვეყანაში და ამავდროულად უზრუნველყოფენ იმ სხვადასხვა მიმართულებების საინვესტიციო დახმარებას, თანადაფინანსებას, რომელიც ქვეყანაში უნდა განხორციელდეს მომდევნო წლებში. საპარტნიორო ფონდიც იქნება ერთ-ერთი საწარმო რომლიც გაივლის რეფორმაც და ქვეყნის ხელშემწყობ საწარმოდ ჩამოყალიბდება“, - განაცხადა გიორგი კაკაურიძემ „საქმიან დილაში“ სტუმრობისას.
აღსანიშნავია, რომ „საპარტნიორო ფონდი“ 2011 წელს დაფუძნდა, თუმცა ამ წლების განმავლობაში არ მომხდარა ფონდის არანაირი განახლება ან მისი სტრუქტურული სახეცვლილება. აღსანიშნავია, რომ „საპარტნიორო ფონდის“ ფორმატის, საქმიანობისა და მანდატის ცვლილების შესახებ საკითხი ჯერ კიდევ წლების წინ ფონდის მიერაა ინიცირებული.
„საპარტნიორო ფონდის“ მენეჯმენტი მიიჩნევს, რომ იმ გამოწვევების ფონზე, რომლებიც ქვეყანაშია, ფონდისთვის პრიორიტეტული ექსპორტზე ორიენტირებული და მაღალტექნოლოგიური საწარმოების დაფინანსება უნდა გახდეს, რომელთა დაფინანსების წყაროებს ფონდი თავად მოიზიდავს. ასევე, უმნიშვნელოვანესია, ფონდს ჰქონდეს მეტი მოქნილობა იმისათვის, რომ ინვესტორებთან ერთობლივი პროექტების განხორციელების გზით, განავითაროს ეკონომიკის ის დარგები და მიმართულებები, რომლებიც დღეს ინვესტიციების ნაკლებობას განიცდის, ან საერთოდ არ არის დაფინანსებული. შესაბამისად „საპარტნიორო ფონდმა“, როგორც სახელწიფო საფინანსო ინსტიტუტმა, უნდა უპასუხოს ქვეყნის ეკონომიკაში დღეს არსებულ გამოწვევებს, უფრო ეფექტიანი მუშაობისთვის კი საჭიროა მისი რეფორმირება“, — აღნიშნულია რამდენიმე თვის წინ თავად ფონდის მიერ გავრცელებულ განცხადებაში.
„საპარტნიორო ფონდის“ აქტივები მისი უკანასკნელი ანგარიშგების თანახმად, 4.6 მილიარდი ლარი, ვალდებულებები კი 3.17 მილიარდი ლარია. ამჟამად ფონდის საკუთრებაში ორი მსხვილი საწარმოა, ესენია საქართველოს რკინიგზა და საქართველოს ნავთობისა და გაზის კორპორაცია. 2020 წელს ფონდის კონსოლიდირებული შემოსავალი 1.49 მილიარდი ლარი, ზარალი კი 196 მილიონი ლარი იყო. წარსულში ფონდის საკუთრებაში ასევე შედიოდა სახელმწიფო ელექტროსისტემა, ესკო და თელასის 25%-იანი წილი.
შეგახსენებთ, რომ 2013-2015 წლებში მთავრობა საპარტნიორო ფონდის რებრენდინგს და „საქართველოს განვითარების ბანკის“ დაფუძნებას განიხილავდა, მაგრამ ეს ინიციატივა არ განხორციელდა.
თავად საპარტნიორო ფონდმა 2015-2020 წლებში 1.34 მილიარდი ლარის ზარალი განიცადა.