საპარტნიორო ფონდი სასტუმრო „ბორჯომი-ლიკანის“ გაყიდვას ისევ შეეცდება, ამჯერად მეოთხედ. სახელმწიფო საინვესტიციო ფონდში „კომერსანტს“ განუცხადეს, რომ 3 წარუმატებელი მცდელობის შემდეგ ობიექტს აუქციონზე კვლავ გამოიტანენ, თუმცა არ იციან როდის.
ფონდში აცხადებენ, რომ პანდემიის დროს სტუმარ-მასპინძლობის სექტორში ინვესტიციების მოზიდვა ძალიან რთული იყო. ამიტომ ლოგიკურად მიაჩნიათ ის, რომ სასტუმროს გასხვისება ვერ მოხერხდა. მათი თქმით, ახლა ტურისტულ სექტორში ინტერესი იზრდება, შესაბამისად იგეგმება „ბორჯომი-ლიკანის“ აუქციონზე გამოტანა.
სასტუმრო „ბორჯომი ლიკანის“ შემდგომი განვითარების მიზნით, საჯარო აუქციონი პირველად 2019 წლის დეკემბერში გამოცხადდა. მაშინ ობიექტის საწყისი ღირებულება 37 565 408 აშშ დოლარს შეადგენდა. მეორე აუქციონი 2020 წლის 4 სექტემბერს გაიმართა, ქონების შესყიდვის მინიმალური ფასი 30 052 326 აშშ დოლარს შეადგენდა. მესამე აუქციონი გასულ წლის ივნისში ჩატარდა. მიუხედავად იმისა, რომ პირველ აუქციონთან შედარებით ფასი თითქმის $13 მლნ–ით ნაკლები იყო ($24 041 861), ინვესტორები ობიექტით არ დაინტერესდნენ.
აღსანიშნავია, რომ სახელმწიფო საინვესტიციო ფონდი 4 წელია ვერ ახერხებს ბიზნესი მომგებიანი იყოს. 2019 წლის აუდიტორული ანგარიშის თანახმად, ხუთვარსკვლავიანი სასტუმროს ზარალი 2016 წელს 12,3 მილიონი ლარი იყო, 2017- ში 4,4 , 2018 - ში სასტუმრომ 4,5 მილიონი ლარის ზარალი განიცადა. 2019 წელს ზარალი 9.9 მილიონი ლარი იყო, ხოლო 2020 წელს 4,5.
ბორჯომ-ლიკანის კურორტის ტერიტორიაზე სასტუმრო 2015 წელს გაიხსნა. „საპარტნიორო ფონდისა“ და ყაზახური კომპანია „KazMunaiGaz Service“-ის ერთობლივი პროექტი იყო, თუმცა 2018 წელს ქართულმა მხარემ პარტნიორებისგან 50%-იანი წილი გამოისყიდა და 100%-იანი წილის მფლობელი ფონდი გახდა. აღსანიშნავია ისიც, რომ თავდაპირველად სასტუმრო „Rixos“-ის ბრენდის სახელით ოპერირებდა, თუმცა 2018 წელს საერთაშორისო ბრენდმა ბორჯომი დატოვა. „ბორჯომი ლიკანის“ საკუთრებაში 156 600 კვ.მ მიწის ფართობი და სასტუმროს შენობა-ნაგებობები შედის. ხუთვარსკვლავიანი სასტუმრო 151 ნომერს აერთიანებს.
ბაჩო ადამია