საპენსიო სააგენტო Facebook-პოსტების განთავსებაში 30 ათას ლარს დახარჯავს. აღნიშნული სერვისის შეძენას კი სააგენტო გამარტივებული შესყიდვის საშუალებით ითხოვს. როგორც საპენსიო სააგენტოს დირექტორის გიორგი დანელიას მიერ სახელმწიფო შესყიდვების სააგენტოს თავმჯდომარისთვის მიწერილი წერილიდან ირკვევა, ქვეყანაში სხვა სოციალურ ქსელებთან შედარებით Facebook-ს ყველაზე მეტი მომხმარებელი ჰყავს და შესაბამისად სწორედ ამიტომ გადაწყდა აღნიშნულ სოციალურ ქსელში პოსტების განთავსება/დასპონსორების აუცილებლობა.
„საპენსიო რეფორმის აქტუალურობიდან გამომდინარე და საზოგადოების მხრიდან მიმდინარე საინვესტიციო პროცესების ირგვლივ არსებული მაღალი ინტერესის გათვალისწინებით საჭიროა სწორი და დროული ინფორმაციის მიწოდება (როგორც დაინტერესებული სქემაში ჩართული პირებისთვის, ასევე ფართო აუდიტორიისათვის) სწორი მოლოდინების ფორმირებისთვის; გამომდინარე იქიდან, რომ დღეის მდგომარეობით, სოციალური ქსელები ინფორმაციის ერთ-ერთ ძირითად წყაროს წარმოადგენს, ამავდროულად ამ სისტემის მუშაობის პრინციპების გათვალისწინებით, გამოწვევად რჩება ცრუ, არასწორი, არასწორად ინტერპრეტირებული და ა.შ. ინფორმაციის შეუზღუდავად გავრცელება. შესაბამისად მოცემული გამოწვევის პასუხად, საჭიროა იგივე არხით განხორციელდეს სწორი და ობიექტური ინფორმაციის გავრცელება, რაც შესაძლებელია როგორც სააგენტოს ოფიციალური პროფილის, ასევე აღნიშნულ სივრცეებში არსებული სარეკლამო ხაზების საშუალებით“, - აღნიშნულის დანელია წერილში.
როგორც ცნობილია, „დაგროვებითი პენსიის შესახებ“ საქართველოს კანონის შესაბამისად, 2019 წლის 1 იანვრიდან ამოქმედდა საპენსიო შენატანების ადმინისტრირების ელექტრონული სისტემა და დამსაქმებლებს, დასაქმებულებსა და თვითდასაქმებულებს წარმოეშვათ დაგროვებით საპენსიო სქემაში გაწევრიანებისა და შესაბამისი ოდენობის საპენსიო შენატანების განხორციელების ვალდებულება.