„საპოლიციო გამოსახლების გაუქმება პოპულისტური ნაბიჯი იყო და მოხდა ურჩი გადამხდელების წახალისება. როგორც იურისტი ვთვლი, რომ უნდა დაბრუნდეს საპოლიციო გამოსახლება, რადგან საპოლიციო მექანიზმის არსებობის შემთხვევაში, ვერც უცხოელი და ვერც ქართველი დამქირავებელი ბოროტად ვერ გამოიყენებდა ამ შესაძლებლობას“, – ამის შესახებ „პალიტრანიუსის“ დილის ეთერში იურისტმა ნუგზარ ტატიშვილმა განაცხადა. იურისტმა უძრავ ქონებასთან დაკავშირებულ რისკებზე, სამართლებრივ დავებსა და საკანონმდებლო რეგულირებაზე ისაუბრა.
ტატიშვილმა ყურადღება გაამახვილა ქირავნობასთან დაკავშირებული დავებით სასამართლოს გადატვირთულობაზე, რაც პროცესს დროში ახანგრძლივებს და მიუხედავად კანონში არსებული ჩანაწერისა, რომ მსგავსი საქმეები შემჭიდროებულ ვადებში უნდა განიხილონ, პროცესი რამდენიმე წელი გრძელდება.
შეგახსენებთ, საკითხმა განსაკუთრებული აქტუალობა, მას შემდეგ შეიძინა, რაც რუსეთ-უკრაინის ომის პარალელურად რუსეთი და ბელარუსი არაერთმა მოქალაქემ დატოვა. მათმა ნაწილმა კი დროებით საცხოვრებლად საქართველო აირჩია და ბინაც იქირავა. ქართველი მესაკუთრეების ნაწილს უცხოელებისთვის ბინის დროებით საკუთრებაში გადაცემა პრობლემად ექცა. უცხოეთის მოქალაქეები შედიან საცხოვრებლებში, შემდეგ კი საფასურს აღარ იხდიან, თუმცა არც ბინას ტოვებენ. პრობლემას საკანონმდებლო ჩანაწერი ქმნის, რომელიც მესაკუთრეს არ აძლევს უფლებას, გამოასახლოს ბინის დამქირავებელი სასამართლოს გარეშე.
„მომართვიანობა ამ ეტაპზე გაზრდილი არ არის, მაგრამ აუცილებლად გაიზრდება, რადგან ბევრი ბინა არის გაქირავებული უცხო ქვეყნის მოქალაქეებზე, მოქმედი კანონმდებლობა კი საკმაოდ შებოჭილია“, - აცხადებს ნუგზარ ტატიშვილი, რომელიც ასევე განმარტავს, რომ კანონმდებლობა არ მიჯნავს უცხოელ და ქართველ გამქირავებელს, მაგრამ აღსრულების ნაწილი უცხოელების შემთხვევაში გართულებულია.
იურისტი, რისკების დაზღვევისთვის რამდენიმე რჩევას გვიზიარებს.
ბინის გაქირავების დროს:
უნდა გაფორმდეს ქირავნობის ხელშეკრულება
გამქირავებელმა უნდა გამოიყენოს აღსრულების ეროვნული ბიუროს სერვისი - ფაქტების კონსტატაცია, რაც გაქირავებამდე უძრავი ქონების დასურათებას და აღწერას ითვალისწინებს.
ხელშეკრულებაში უნდა იქნეს გათვალისწინებული პოტენციური დავა და გაკეთდეს ჩანაწერი, რომ პირველი ინსტანციის სასამართლოს გადაწყვეტილება დაუყოვნებლივ აღსასრულებლად მიეცეს.
დავის დაწყების შემთხვევაში, გამოსახლების მოთხოვნასთან ერთად, გამქირავებელმა უნდა მოითხოვოს მიუღებელი შემოსავლის, სასამართლო დავის პროცესში გაცდენილი პერიოდის ანაზღაურების დაკისრება დამქირავებლისთვის.
აღსანიშნავია, რომ მოქმედი კანონმდებლობით, ქირავნობის ხელშეკრულების წერილობით გაფორმება სავალდებულო არ არის, მაგრამ რისკების დაზღვევისთვის და სასამართლო დავის დაწყების შემთხვევაში, ყველა მხარის, როგორც დამქირავებლის, ასევე გამქირავებლის ინტერესების დაცვისთვის, იურისტები საწყის ეტაპზევე ხელშეკრულების გაფორმებას გვირჩევენ. აქვე გეტყვით, რომ ქირავნობის ხელშეკრულების გაფორმების შემთხვევაში, ფიზიკური პირი იბეგრება 5%-ით.
ბინის გაქირავება
