მიუხედავად იმისა, რომ მსოფლიოს ცენტრალური ბანკები მონეტარული პოლიტიკის გამკაცრებით და საპროცენტო განაკვეთების ზრდით ცდილობენ პიკურ ინფლაციასთან ბრძოლას, სამომხმარებლო ფასების ზრდა შემცირების ტრენდს არ აჩვენებს.

ბრიტანეთში ინფლაციის დონემ სექტემბერში 10.1% შეადგინა, რაც ნავარაუდევზე მაღალი მაჩვენებელია. ამასთან ბრიტანეთში ინფლაციის დონე ანალოგიურია როგორც ეს წინა თვეებში იყო. გაერთიანებულ სამეფოში სურსათი წლიურად 14%-ზე მეტად არის გაძვირებული, ტრანსპორტი კი 10.9%-ით.

ინფლაციის დონე პროგნოზებზე მაღალია ამერიკის შეერთებულ შტატებში, სადაც წლიურად სამომხმარებლო ფასები 8.2%-ით გაიზარდა. ამერიკაში ფასები ბოლო 40 წლის განმავლობაში ყველაზე სწრაფად იზრდება.
საპირისპიროდ მოსალოდნელზე დაბალი აღმოჩნდა ინფლაციის დონე ევროზონაში და მან სექტემბერში 9.9% შეადგინა.

ცენტრალური ბანკები მონეტარული პოლიტიკის შემდგომ გამკაცრებაზე გადაწყვეტილებას 27 ოქტომბრიდან მიიღებენ. ფასების ზრდის დონე კი ქმნის მოლოდინს რომ საპროცენტო განაკვეთები კიდევ უფრო მეტად გაიზრდება. TBC Capital წერს რომ როგორც ბრიტანეთის, ასევე ევროპისა და ამერიკის ცენტრალური ბანკები განაკვეთს მინიმუმ 0.75 პროცენტული პუნქტით გაზრდიან.

განსაკუთრებული სიფრთხილე მართებს ინგლისის ცენტრალურ ბანკს, რადგან ერთის მხრივ გამკაცრებულმა მონეტარულმა პოლიტიკამ ფუნტის რეკორდული გაუფასურება უნდა შეუშალოს ხელი, ხოლო მეორეს მხრივ საპროცენტო განაკვეთის ზრდით ეკონომიკური აქტივობის შეზღუდვამ ქვეყანა შესაძლოა რეცესიის რისკის წინაშე დააყენოს. მიუხედავად სამისა ანალიტიკოსთა ნაწილი ელის რომ ბრიტანეთს განაკვეთის დამატებით 1 პროცენტული პუნქტით გაზრდა მოუწევს - შედეგად ქვეყანაში განაკვეთი 2023 წლისთვის 5.25% იქნება რაც პიკურად მაღალი მაჩვენებელია.

განაკვეთის ცვლილებაზე მომდევნო კვირას მიიღებს გადაწყვეტილებას საქართველოს ეროვნული ბანკიც. ბოლო მონაცემებით სექტემბერში ქვეყანაში ინფლაცია კვლავ დაჩქარდა და 11.5% შეადგინა, მიუხედავად იმისა რომ ადგილობრივი ანალიტიკური ორგანიზაციები წინა თვესთან შედარებით ფასების ზრდის დონის შემცირებას ელოდნენ. საქართველოში უკვე წელიწადი და 3 თვეა ორნიშნა ინფლაცია ფიქსირდება - ზრდა ყველაზე მაღალი სურსათსა და ტრანსპორტზეა.