ირანის, აზერბაიჯანისა და საქართველოს გავლით ახალი სატრანსპორტო დერეფანი სატესტო რეჟიმში ამოქმედდა, რომელიც სპარსეთის ყურეს შავ ზღვასთან აკავშირებს. ამის შესახებ ინფორმაციას აზერბაიჯანული სააგენტო Trend ავრცელრბს.
ირანის საავტომობილო გზებისა და ტრანსპორტის ორგანიზაციის საერთაშორისო ტრანზიტის სამმართველოს გენერალური დირექტორი ჯავად ჰედაიათი აცხადებს, რომ ახალი დერეფნის გაშვება ეკონომიკური და სატრანსპორტო კავშირების გაღრმავებას ისახავს მიზნად. მისი თქმით, ტვირთის გადაზიდვის სატესტო რეჟიმის დასრულების შემდეგ, გაიმართება სამმხრივი შეხვედრა, სადაც მხარეები ტრანსპორტირების გამარტივების დეტალებზე შეთანხმდებიან.
ჯავად ჰედაიათი მიიჩნევს, რომ ამ დერეფნის მეშვეობით სამხრეთ-აღმოსავლეთ აზიისა და ინდოეთის ქვეყნები აღმოსავლეთ და დასავლეთ ევროპას დაუკავშირდებიან, რაც რეგიონის ქვეყნებს შორის სახმელეთო სატრანსპორტო მიმოსვლას გააფართოვებს.
„ამ დერეფნის გავლით 20 მილიონი ტონა ტვირთის გადაზიდვა იგეგმება, ხოლო 20-წლიან პერიოდში ეს მაჩვენებელი წელიწადში 50 მილიონ ტონამდე გაიზრდება“, - აცხადებს ჯავად ჰედაიათი.
თავრიზში აზერბაიჯანის გენერალური კონსულის, ალიანაგი ჰუსეინოვის თქმით, ახალი დერეფანი ირანს, აზერბაიჯანსა და საქართველოს შორის სავაჭრო-ეკონომიკური ურთიერთობების განვითარებას ხელს შეუწყობს და ამ ქვეყნების ეკონომიკურ პოტენციალს მნიშვნელოვნად გააძლიერებას.
„ამ დერეფნის გამოყენება შავი ზღვის გავლით ევროპასთან ვაჭრობის შესაძლებლობას შექმნის და საქონლის გადაზიდვის მანძილს შეამცირებს. ახალი დერეფნის ამოქმედება უახლოეს მომავალში დადებითად აისახება სავაჭრო ბრუნვაზე, როგორც რეგიონში, ისე მის ფარგლებს გარეთ“, - აცხადებს ალიანაგი ჰუსეინოვი.
სპარსეთის ყურე-შავი ზღვის მარშრუტით, სამი ქვეყნის 144 სატვირთო მანქანა სატესტო რეჟიმში ირანის ჩრდილო-დასავლეთ პროვინციის ქალაქ თავრიზიდან გავიდა.
bpn.ge