რამდენიმე დღეში საქართველო ITB Berlin-ზე მასპინძელი ქვეყნის სტატუსით წარდგება. რა მოლოდინებია და რას მოუტანს მასპინძელი ქვეყნის სტატუსი საქართველოს, ამ თემაზე რადიო „კომერსანტის“ ეთერში სასტუმროების და რესტორნების ფედერაციის ხელმძღვანელმა შალვა ალავერდაშვილმა ისაუბრა. მისი თქმით ITB Berlin მსოფლიოში ყველაზე დიდი ტურისტული გამოფენაა და ეს ქვეყნის პოპულარიზაციისთვის ყველაზე მაღალი დონის კამპანიაა, რომელიც ძალიან წარმატებით მიმდინარეობს.

„პირველ რიგში ITB Berlin-იდან ცნობადობის ამაღლებას ველოდებით, ჩვენი ქვეყანა არის ერთ-ერთი საუკეთესო ტურისტული მიმართულება და ITB Berlin-ზე მონაწილეობის მოტივაციაც სწორედ ეს არის, რომ მთელმა მსოფლიომ გაიგოს ჩვენ შესახებ. გამოფენაში მსოფლიოს ყველა ქვეყნის წარმომადგენელი იღებს მონაწილეობას. ამ პერიოდში საქართველო სრულად იქნება წარმოდგენილი, როგორც საგამოფენო სივრცეში, ასევე ბერლინში ყველა მაღალი დონის ადგილებში, ავტობუსებში და  ა.შ. ყველგან არის საქართველოს შესახებ ინფორმაცია და ბერლინი იქნება საქართველოთი მოცული და ჟურნალისტებს საქართველოს შესახებ ინფორმაცია მიეწოდებათ,“- აღნიშნა  შალვა  ალავერდაშვილმა.

შალვა ალავერდაშვილის თქმით, გამოფენის  ეფექტი წლების განმავლობაში გაგრძელდება და საქართველოს სტუმრები თანდათანობით მოემატება.

„რაც შეეხება საქართველოს მზაობას, საქართველო მზად არის, რომ იმაზე ორჯერ მეტ სტუმარს უმასპინძლოს, ვიდრე აქამდე იღებდა, სასტუმროებიც და რესტორნებიც ამისთვის მზადყოფნაშია.  ჩვენი მუდმივი მოვალეობაა, რომ  ხარისხის გაუმჯობესებაზე ვიმუშაოთ, ეს არის უწყვეტი პროცესი და ყოველთვის უნდა მიმდინარეობდეს.“- აღნიშნა შალვა ალავერდაშვილმა.

შალვა ალავერდაშვილი აცხადებს, რომ საქართველო ერთ რეგიონზე დამოკიდებული არ უნდა იყოს და ახალი  ქვეყნებიდან უნდა ეცადოს ხალხის  მოზიდვას. მისივე  თქმით, პანდემიის მერე საქართველო ევროპიდან ძალიან დიდ ნაკადებს ელოდა, თუმცა ამის შემაფერხებელი მიზეზი რუსეთის უკრაინაში შეჭრა გახდ. ალავერდაშვილი დარწმუნებულია, რომ ომის დასრულების შემდეგ ევროპელი ტურისტები საქართველოზე კვლავ გადმოერთვებიან.

„ჩვენ დაჯილდოვებული ვართ იმით, რომ საქართველოში ყველგან გვაქვს ბალნეოლოგიური ტურიზმის განვითარების კერა, რამდენიმე რეგიონი ამ მხრივ საკმაოდ კარგად  განვითარდა, თუმცა უამრავი სხვა ადგილია სადაც ბალნეოლოგიური მიმართულების  განვითარებაა შესაძლებელი. ბალნეოლოგიას სეზონურობა არ ახასიათებს და ადამიანები სამკურნალოდ ჩამოდიან დროის  ნებისმიერ პერიოდში და  სხვადასხვა მიმართულებით მკურნალობას იტარებენ, რაც უფრო მეტად  განვითარდება  ბალნეოლოგიური ინფრასტრუქტურა, მით უფრო ნაკლები იქნება სეზონზე  დამოკიდებულება და მთელი წლის განმავლობაში ტურისტული  ინფრასტრუქტურა  უფრო მეტად  დაიტვირთება,“— აღნიშნა შალვა ალავერდაშვილმა.

კითხვაზე, თუ რამდენად მობილიზებულები ხვდებიან გამოფენას ის კომპანიები, რომლებიც   ITB Berlin- ზე წარდგებიან, შალვა  ალავერდაშვილი პასუხობს, რომ რაც უფრო მეტად დივერსიფიცირებული იქნება ბაზარი და მეტ სერვისს შესთავაზებს მსოფლიოს, მით უფრო მეტი მომხმარებელი გვეყოლება.

„რაც უფრო მეტ შესაძლებლობას მივცემთ ტურისტს, რომ სხვადასხვა ადგილები მოინახულონ საქართველოში, მით მეტი ტურისტი გვეყოლება, ზოგი ბალნეოლოგიისთვის ჩამოვა,  ზოგი ყველისთვის, ზოგი ღვინისთვის, ზოგი  სათავგადასავლო  ტურიზმისთვის  და  ა.შ.  რაც უფრო მეტი სხვადასხვა მიმართულება გვექნება ქვეყანაში, მით უფრო მეტად  წარმოვჩინდებით მსოფლიო რუკაზე,“ — აღნიშნა შალვა ალავერდაშვილმა.

თაკო კვაჭანტირაძე