სახელმწიფო 95 მლნ კვტ/სთ ელექტროენერგიას ბარტერული გარიგებით შეიძენს. როგორც ეკონომიკისა და მდგრადი განვითარების მინისტრის №1-1/431 ბრძანებიდან ირკვევა, რუსეთიდან თურქეთისთვის განკუთვნილი ელექტროენერგიიდან, რაც საქართველოზე ტრანზიტულად გადის, ქვეყანა 95 მლნ კვტ/სთ-მდე ელექტროენერგიას ბარტერული გარიგებით მიიღებს.

უფრო კონკრეტულად,მინისტრის ბრძანებაში წერია, რომ ოქტომბერში ტრანზიტის განხორციელებისას, ეგხ 220 კვ ,,სალხინოთი“ და ეგხ 110 კვ „ნაკადულით“ შემოტანილი და თურქეთის რესპუბლიკაში სატრანზიტოდ განკუთვნილი ელექტროენერგიის ნაწილი (არაუმეტეს 95 000 000 კვტ/სთ იმპორტირებული ელექტროენერგია) იმპორტიორისგან შესყიდულ იქნეს ელექტროენერგეტიკული ბაზრის ოპერატორის მიერ, იმპორტის პირდაპირი ხელშეკრულების საფუძველზე, რომლის ანაზღაურება განხორციელდება იმავე მოცულობის ელექტროენერგიის იმპორტიორისათვის დაბრუნებით.

ელექტროენერგეტიკული ბაზრის ოპერატორის მიერ, იმპორტის პირდაპირი ხელშეკრულების თანახმად შესყიდული ელექტროენერგიის იმპორტიორისათვის დაბრუნება განხორციელდება 2022 წლის ნოემბერ-დეკემბრის თვეებში, მხარეებს შორის დამატებით გაფორმებული ექსპორტის პირდაპირი ხელშეკრულების საფუძველზე. ამასთან, ელექტროენერგიის დაბრუნება და აღნიშნული მიზნით ტრანსსასაზღვრო ხაზის საექსპორტო მოცულობის განაწილება განხორციელდეს შესაბამისი საანგარიშო პერიოდისათვის ელექტროენერგიის (სიმძლავრის) ბალანსით განსაზღვრული მოცულობებისა და ელექტროენერგეტიკული სისტემის საექსპორტო პოტენციალის გათვალისწინების გარეშე.