რუსეთის მიერ უკრაინის მიმართ დაწყებული საომარი მოქმედების მიუხედავად, რუსეთ-საქართველოს სარაგბო ნაკრებები 27 თებერვალს მაინც იასპარეზებენ. ამის შესახებ ,,კომერსანტს“ ვეტერანმა რაგბელმა, დეპუტატმა ირაკლი აბუსერიძემ განუცხადა.

მისი თქმით, დაგეგმილი თამაში ჩატარდება და ახლა ის დროა, რომ ქართულ გუნდს მაქსიმალურად დაუჭირონ მხარი.

,,საქართველო-რუსეთის თამაში ევროპის რაგბის კავშირის მიერ არის დაგეგმილი., აქამდე გვაცნობებდნენ, თუკი შეცვლიდნენ თარიღს ან გაუქმებაზე ეფიქრათ.  უმეტეს შემთხვევაში,  საქნციები სპორტზე არ გავრცელდება. შესაბამისად, ჩვენ ვერ გავაუქმებთ ამ შეხვედრას, მაგრამ შეგვიძლია ვუგულშემატკივროთ, მაქსიმალურად დავუჭიროთ მხარი ქართველ რაგბელებს.  დღეს რაგბის გულშემატკივართა დიდი ინტერესია თბილისისკენ მოპყრობილი. რაც შემიძლია ამ ბიჭებს ვუსურვო,  გავამხნევოთ და ვუსურვოთ გამარჯვება, რაც პრინციპულად მნიშვნელოვანია“, - აცხადებს ირაკლი აბუსერიძე.

შეგახსენებთ, რომ საქართველოს სარაგბო ნაკრები რუსეთს კვირას, 18:00 საათზე უმასპინძლებს თბილისის „დინამო არენაზე“, რაგბის ევროპის ჩემპიონატის მესამე ტურის შეხვედრაში.

მომავალ თამაშს რაგბის გულშემატკივრები  განსაკუთრებული ინტერესით ელიან. ცხადია, რომ  თამაში წინა შეხვედრებზე მეტად დაძაბული იქნება. რუსეთის მიერ დონეცკისა და ლუგანსკის ,,დამოუკიდებლობის აღიარების გამო, ქართველი გულშემატკივრების ნაწილი საქართველოს ნაკრების უკრაინის დროშით ქომაგობას გეგმავს.

საქართველო-რუსეთის დაპირისპირებაზე დასწრებას სტადიონის ტევადობის ნახევარი, დაახლოებით 25 ათასი გულშემატკივარი შეძლებს.