„ჯამში, 10 მიმართულებიდან იკვეთება ტვირთების მოზიდვის შესაძლებლობა“,- ამის შესახებ სატრანსპორტო დერეფნის კვლევის ცენტრის დირექტორმა პაატა ცაგარეიშვილმა „ბიზნესპრესნიუსთან“ საუბრისას განაცხადა.
მისი თქმით, 16-20 მლნ ტონა ტვირთის მოზიდვის შესაძლებლობა არსებობს და თუ საქართველომ 60%-ის ათვისება მაინც შეძლო, ქვეყანაში 10-12 მლნ ტონა ტვირთის ტრანზიტი მოხდება.
შეგახსენებთ, რომ ყაზახეთმა ექსპორტის ალტერნატიული მარშრუტები შეიმუშავა, რომლის მიხედვითაც, ტვირთების ტრანზიტს საქართველოს გავლით განახორციელებს. ამასთან, როგორც ცნობილია, ყაზახური ნავთობის რუსული მარშრუტის ალტერნატივად შესაძლოა, ბაქო-თბილისი ჯეიჰანის მილსადენი გახდეს. ყაზახი ნავთობმწარმოებლები ერთ-ერთ ვარიანტად ბაქო-თბილისი-ჯეიჰანის მილსადენის გამოყენებას განიხილავენ, რომელიც ყაზახური ნავთობის ნაწილს ისედაც ატარებს.
„იმ ბატალიების შემდეგ, რაც მეზობელ ქვეყნებში განვითარდა, ჩვენ ვაკეთებთ კვლევას, რომლის მიხედვითაც, ჯამში 10 მიმართულებით იკვეთება ტვირთების მოზიდვის შესაძლებლობა. ეს არის ის, რასაც ხელის გულზე დევს, 10 მიმართულებიდან წამოვა ტვირთების ნაკადი.
ჯამურად, 16-20 მლნ ტონა ტვირთის მოზიდვის შესაძლებლობაა და თუ ჩვენ ამ ტვირთის 60% მაინც მივიღეთ, გამოდის 10-12 მლნ ტონა ტვირთვის გატარებას შევძლებთ. მაგალითად, ყაზახეთი ამბობს, რომ 2 მლნ ტვირთს გაატარებს საქართველოზე. გარდა ამისა, საუბარია ნავთობზეც, რომელსაც ყაზახეთი ბაქო-თბილისი-ჯეიჰანის მილსადენში გატარებასთან ერთად, რკინიგზაზე გადმომისამართებასაც გეგმავს.
ზოგადად კი, ეს 12 მლნ ტონა ტვირთი რომ გავატაროთ, დაახლობით 2-3 წელი დაგვჭირდება ამისთვის. ტვირთის მოზიდვა არ არის მოკლევადიანი, ეს არის ინერტული პროცესი და პერიოდი სჭირდება მის განხორციელებას.
ახლა მეორე საკითხია, ჩვენ ეს დრო არ უნდა დავკარგოთ და ის, რაც 10 წლის განმავლობში ვერ მოვახერხეთ ლოჯისტიკურად და ორგანიზაციულად, ანუ, რა ჩამორჩენაც გვაქვს, უნდა მოგვარდეს. ეს არის წინაპირობა, რომ ეს ტვირთი გავატაროთ და ამ 10 მიმართულებით სატრანსპორტო დერეფანი გავხდეთ“,- განაცხადა პაატა ცაგარეიშვილმა.
სატრანსპორტო დერეფანი
