საქართველო-თურქეთს შორის გაფორმებულ თავისუფალი ვაჭრობის შესახებ შეთანხმებაში ცვლილებების შეტანა იგეგმება.
შედეგად, გაფართოვდება იმ პროდუქტების ჩამონათვალი, რომლის ექსპორტზე გატანაც საქართველოდან მეზობელ ქვეყანაში გამარტივებული რეჟიმით იქნება შესაძლებელი. ამასთან, მხარეები მუშაობენ საკითხზე, რომ შეთანხმებამ პროდუქტებთან ერთად სერვისის მიმართულებაც მოიცვას.
სწორედ თავისუფალი ვაჭრობის რეჟიმის გადახედვა იყო ერთ-ერთი მთავარი საკითხი, რაც საქართველოში ვიზიტით მყოფმა თურქეთის ვაჭრობის მინისტრის მოადგილემ ქართულ მხარესთან განიხილა.
მუსტაფა თუზჯუს განცხადებით, ცვლილებების შედეგად ქართველ ექსპორტიორებს შესაძლებლობა ექნებათ თავისუფალი ვაჭრობის რეჟიმით თურქეთში ისეთი პროდუქცია შეიტანონ როგორიცაა მაგალითად თაფლი, სხვადასხვა ბოსტნეული და წვენები.
„ამ დროისთვის საქართველოსა და თურქეთს შორის თავისუფალი ვაჭრობის შეთანხმება მოიცავს მხოლოდ პროდუქციას და ის არ ვრცელდება სერვისებზე. ამიტომ გვსურს, რომ მას დავამატოთ სხვა მიმართულებებიც, მაგალითად ტრანსპორტირება, ფინანსური სერვისები. ასევე გვინდა, რომ შეთანხმება მოიცავდეს სოფლის მეურნეობის უფრო მეტ პროდუქციას. ქართული მხარისგან არის მოთხოვნა, რომ ხელშეკრულებას დაემატოს თაფლი, სხვადასხვა ცხოველური პროდუქცია და ვფიქრობთ, ამ მიმართულებით პროგრესს მომავალი წლისთვის მივაღწევთ. ჩვენი მოსაზრებაა, რომ ქვეყნებს შორის სავაჭრო ბრუნვა სამ მილიარდამდე გავზარდოთ და ეს ცვლილებებიც დაგვეხმარება ამ მიზნის მიღწევაში. თუმცა იმისთვის, რომ საქართველოდან თურქეთში ექსპორტი გაიზარდოს, აუცილებელია თავად ქართული პროდუქციის წარმოება გაიზარდოს“,- განაცხადა თურქეთის ვაჭრობის მინისტრის მოადგილემ მუსტაფა თუზჯუმ.
ცნობისთვის, სავაჭრო ბრუნვის მიხედვით თურქეთი საქართველოს მთავარი პარტნიორი ქვეყანაა და ქვეყნებს შორის სავაჭრო ბრუნვამ მიმდინარე წლის 11 თვეში მილიარდ 900 მლნ დოლარს მიაღწია. თუმცა იმპორტი კვლავ მნიშვნელოვნად აღემატება ექსპორტს, იანვარ-ნოემბერში თურქეთიდან იმპორტმა 1.6 მლრდ დოლარს მიაღწია, ხოლო საქართველოდან მეზობელ ქვეყანაში ამ პერიოდში 291 მლნ დოლარის ღირებულების პროდუქცია გავიდა.
წყარო: business formula.ge