საქართველოსა და არაბთა გაერთიანებულ საამიროებს შორის თავისუფალი ვაჭრობის შეთანხმების შესახებ მესამე დასკვნითი რაუნდი დაიწყო. საქართველოსა და არაბთა გაერთიანებულ საამიროებს შორის ვაჭრობა 2022 წელს სწრაფი ტემპით გაიზარდა, მათ შორის  ექსპორტი 51%-ით, $31 მილიონამდე, ხოლო იმპორტი 98%-ით, 283 მილიონ დოლარამდე გაიზარდა. არაბთა გაერთიანებულ საამიროებში საქართველო ყველაზე მეტს ავტომობილებს, ხალიჩებს და  სპირტიან სასმელებს ყიდის.

ავტოიმპორტიორთა ასოციაციის თავმჯდომარე ლაშა დარბაისელმა „კომერსანტთან“ ბიზნესისთვის თავისუფალი სავაჭრო ხელშეკრულებების მნიშვნელობასა და მის გავლენაზე ისაუბრა.

„ამ ბიზნესში საქართველო არის აზიის და ევროპის დამაკავშირებელი და ეს პოზიცია კიდევ უფრო რომ გავიმყაროთ, ამაში მსგავსი გადაწყვეტილებები კიდევ უფრო მეტად გვეხმარება. რაც შეეხება კონკრეტულად არაბთა გაერთიანებულ საამიროებს, ეს ქვეყანა მართალია ავტომობილების კუთხით, მთავარი იმპორტიორი არ არის და დიდი მასშტაბებით არ ხდება პროდუქციის იქედან შემოტანა ან თუნდაც გატანა, თუმცა აზიის ქვეყნები ძალიან მნიშვნელოვანია. ამ ეტაპზე უდიდესი მოლოდინი, რომ თავისუფალი სავაჭრო შეთანხმების გაფორმების შემდეგ დაიწყება მასშტაბების რადიკალური ზრდა, არ გვაქვს, მაგრამ ბაზრების დივერსიფიცირების კუთხით მაინც მნიშვნელოვანი ქვეყანაა. საჭირო იქნება უფრო მეტად ბაზრის შესწავლა და დაკვირვება. ზოგადად თავისუფალი ვაჭრობის შეთანხმების გარდა, აუცილებელია მაგალითად შუა აზიის ქვეყნებთან ურთიერთობაში ჩაერთოს სახელმწიფო, საელჩოები რათა გავცვალოთ ინფორმაციები, რაც ძალიან დაეხმარება ბიზნესს და გაუმარტივებს მუშაობის პროცესს“, - ამბობს ლაშა დარბაისელი.

საქართველოსა და არაბთა გაერთიანებულ საამიროებს შორის ეკონომიკური, სავაჭრო და საინვესტიციო ურთიერთობების ხელშეწყობის მიზნით, ჯერ კიდევ 2020 წლის დეკემბერში, ორი ქვეყნის ეკონომიკის მინისტრების მიერ მიღებულ იქნა გადაწყვეტილება თავისუფალი ვაჭრობის შესახებ შეთანხმების მოლაპარაკებების დაწყებასთან დაკავშირებით, ხოლო 2022 წლის 9 მაისს ხელი მოეწერა საქართველოსა და არაბთა გაერთიანებულ საამიროებს შორის ყოვლისმომცველი ეკონომიკური პარტნიორობის შესახებ შეთანხმების მოლაპარაკების პირობების დოკუმენტს.