„თიბისი კაპიტალის“ კაკლოვანი კულტურების ბაზრის კვლევის მიხედვით, 2021 წელს საქართველოდან 118 მლნ დოლარის ღირებულების კაკლოვანი კულტურები გავიდა ექსპორტზე, რაც 26%-ით აღემატება წინა წლის მაჩვენებელს. კაკლოვნების ექსპორტის მთლიანი ღირებულების 97%-ს კი თხილის ექსპორტი წარმოადგენს. მიუხედავად იმისა, რომ თხილზე მოთხოვნა მაღალია საერთაშორისო ბაზარზე, გლობალურ ასპარეზზე საქართველო ჯერ-ჯერობით სუსტად არის წარმოდგენილი. იმისათვის, რომ საქართველომ საერთაშორისო ბაზრის პოტენციალი აითვისოს, საჭიროა მიიღწეს სტაბილურობა თხილის წარმოებაში, როგორც ხარისხის, ისე წარმოების მოცულობის თვალსაზრისით.

კაკლის შემთხვევაში შიდა ბაზარზე მოთხოვნა მნიშვნელოვნად აღემატება წარმოებას, ამავდროულად, ფასი უფრო მაღალია ვიდრე მსოფლიო ბაზარზე, შესაბამისად, ჯერჯერობით მთლიანი წარმოება ადგილობრივად მოიხმარება. მოთხოვნა მაღალია როგორც გადაუმუშავებელ, ასევე - გადამუშავებულ კაკალზე. ადგილობრივი მოთხოვნის დასაკმაყოფილებლად კაკალი იმპორტითაც შემოდის. თუმცა, რამდენიმე წელიწადში, წარმოების ზრდასთან,  ერთად კაკლის ექსპორტი უფრო აქტუალური გახდება. მსოფლიოში წარმოების ზრდის კვალდაკვალ, ქართულ კაკალს საკმაოდ კონკურენტულ ბაზარზე მოუწევს შესვლა.

საქართველოს ბაზრისთვის შედარებით ახალი კულტურებია ნუში და ფისტა. მცირე მოცულობის წარმოების გამო ეს კულტურები ჯერჯერობით ექსპორტზე არ გასულა. ადგილობრივ ბაზარზე მოთხოვნა ამ კულტურებზე შედარებით დაბალია და მცირე რაოდენობით შემოდის იმპორტით.  ადგილობრივ ბაზარზე  უკვე იყიდება ქართული ნუში, ხოლო ქართული ფისტა მომდევნო წლიდან შეიძლება გამოჩნდეს.

კაკლოვანი კულტურების ბაზარი საკმაოდ კონკურენტულია და ამასთანავე პერსპექტიული, რის გამოც წლიდან წლამდე სულ უფრო იზრდება ინტერესი ამ დარგის მიმართ, როგორც მსოფლიოში, ასევე, საქართველოში.  კაკლოვნებით ვაჭრობა მსოფლიო ვაჭრობის 0.11%-ს შეადგენს. 2020-2021 წლებში კაკლოვნების ექსპორტი მსოფლიოში გაიზარდა 7%-ით. ღირებულების თვალსაზრისით, კი 2021 წელს  20 მილიარდ დოლარს მიაღწია.

2021 წელს კაკლოვნების მთავარი ექსპორტიორები იყვნენ შეერთებული შტატები ($8, 1 მილიარდი), თურქეთი ($1,8 მილიარდი), ირანი ($943 მილიონი), ჩინეთი ($907 მილიონი) და ესპანეთი ($897 მილიონი). მათი წილი მთლიან ექსპორტში თითქმის მესამედს შეადგენს.

ევროპა კაკლოვანი კულტურების ერთ-ერთი დიდი მწარმოებელი და ექსპორტიორია, ამავდროულად ის, კაკლოვანი კულტურების წამყვანი მომხმარებელიცაა. საქართველოსთვისაც ევროპა ერთ-ერთი ყველაზე მნიშვნელოვანი სავაჭრო პარტნიორია კაკლოვანი კულტურების მიმართულებით.