შპს „საქართველოს აეროპორტების გაერთიანებას“ დირექტორის პოზიციაზე კონკურსი აქვს გამოცხადებული. განაცხადების მიღების ვადა 29 დეკემბრამდეა.
კანდიდატს საავიაციო სფეროში უმაღლესი განათლება, ამავე სფეროში მუშაობის 5 წლიანი გამოცდილება, ხელმძღვანელ პოზიციაზე მუშაობის სულ მცირე 3 წლიანი გამოცდილება და ინგლისური ენის სრულყოფილი ცოდნა (C2 დონე) მოეთხოვება.
თანამდებობას ამჟამად თამარ არჩუაძე იკავებს, რომლის შემცვლელადაც „კომერსანტის“ ინფორმაციით, სავარაუდოდ ირაკლი ქარქაშაძე მოიაზრება, რომელიც ნოემბრის ბოლომდე ქუთაისის მერის მოადგილის თანამდებობას იკავებდა, სადაც სოციალურ საკითხებს, ტურიზმისა და საერთაშორისო ურთიერთობების მიმართულებებს ხელმძღვანელობდა.
ირაკლი ქარქაშაძე 2014-2016 წლებში საქართველოს აეროპორტების გაერთიანება საავიაციო ინდუსტრია - ბიზნეს განვითარების კოორდინატორი იყო. 2020 წლიდან - დღემდე საქართველოს სავაჭრო სამრეწველო პალატა (საავიაციო ინდუსტრია) საავიაციო კომიტეტის მდივანია.
შპს „საქართველოს აეროპორტების გაერთიანება“ შეიქმნა 2010 წელს საქართველოს სამოქალაქო აეროპორტების მართვის კოორდინაციის მიზნით. კომპანიის დამფუძნებელი პარტნიორი და წილის 100%-ის მესაკუთრე არის სახელმწიფო. საქმიანობის ძირითადი მიმართულებებია: საქართველოს სამოქალაქო აეროპორტებზე ზედამხედველობა; საქართველოს სამოქალაქო აეროპორტების დაპროექტების, მშენებლობის, მოდერნიზებისა და განვითარების უზრუნველყოფა; საქართველოს სამოქალაქო აეროპორტებში ფრენის უშიშროებისა და უსაფრთხოების დონის ამაღლება.
შეგახსენებთ, რამდენიმე დღის წინ დადასტურდა „კომერსანტის“ ექსკლუზიური ინფორმაცია კიდევ ერთი კონკურსის შედეგთან დაკავშირებით, „კომერსანტი“ კონკურსის შედეგის გამოცხადებამდე 3 კვირით ადრე წერდა, რომ ტურიზმის ეროვნული ადმინისტრაციის ხელმძღვანელის თანამდებობას მაია ომიაძე დაიკავებდა.