საქართველოს ბანკი კორპორაციული სოციალური პასუხისმგებლობის ფარგლებში პროექტების განხორციელებას აქტიურ რეჟიმში აგრძელებს. ამ მიმართულებით 2017 წლის შემდეგ ბანკი არ გაჩერებულა და საგრანტო კონკურსის ფარგლებში ყოველწლიურად ავლენს სოციალური მისიის მქონე საუკეთესო პროექტებს, რომლებსაც შემდეგი განვითარების მიზნით 50 000 ლარიანი გრანტით აფინანსებს. ბანკმა წელსაც, სულ რამდენიმე დღის წინ, სამი საუკეთეო სოციალური პროექტი დაასახელა. ესენია: პირველი ქართული ეკო მეგობრული, მწვანე, USB კაბელის საწარმო „ტენე“; ბიოფიჭის მდგრადი სოციალური საწარმო და ქართული მუსიკალური სექტორის მულტიმედიური პლატფორმა „Basement“.

სანამ ახალი საწარმოები სრული დატვირთვით ამუშავდება და დაიწყებს გრანტის ათვისებას, დავინტერესდით როგორ განვითარდნენ ბანკის მიერ წინა წლებში მხარდაჭერილი ბიზნესები. მაგალითად, როგორ ინარჩუნებს მდგრადობას არტვილა „გარიყულას“ ტერიტორიაზე არსებული ფრანგული მეთოდით ცქრიალა ღვინის „შაპიდონის“ საწარმო.


საქართველოს ბანკის საგრანტო კონკურსის ფარგლებში „შაპიდონმა“ 50 000 ლარის დაფინანსება ჯერ კიდევ რამდენიმე წლის წინ მიიღო, რაც კომპანიის დამფუძნებლის ჯაბა მუჯირის თქმით, ძირითადად დანადგარების შეძენასა და მარნის მოწესრიგებას მოხმარდა.

„სოციალური საწარმოს პროექტის ფარგლებში მიღებული ფინანსური რესურსი დანადგარებზე და მარნის მოწყობაზე გამოვიყენეთ, გარდა ამისა, ჩამოვასხით 1800 ბოთლი და გასულ წელს დავიწყეთ გაყიდვები. საკმაოდ კარგი გამოხმაურება მოჰყვა, წელს კიდევ ვაპირებთ 3000 ბოთლის ჩამოსხმას. გარდა ამისა, დავამზადეთ საშამპანურე მასალა, რაც 9 თვის მერე მზად იქნება. მოგეხსენებათ, ცქრიალა ღვინის დამზადებას თავისი ვადები აქვს. მარანი ფაქტობრივად დამთავრებულია და საწარმოს გაფართოებასაც ვგეგმავ. ცქრიალა ღვინით, რომელიც ადგილობრივ ბაზარზე პოპულარული გახდა საუკეთესო რესტორნები და ღვინის მაღაზიები მარაგდება.

CHAPIDON იყო სტარტაპი და რომ არა „საქართველოს ბანკის“ პროექტი ამ იდეას ვერ განვახორციელებდით, იდეა გვქონდა თუმცა შესაბამისი ფინანსური რესურსი, არა. ამ პროექტმა მომცა ბიძგი, რომ ბიზნესის განსავითარებლად თანხა მომეძიებინა. საკუთარი დანაზოგით მოვაწყვე საკმაოდ კარგი ინფრასტრუქტურა, 80 კვადრატული მარანი ავაშენე, ამასთან, 50 კვადრატულ მეტრის სადეგუსტაციო სივრცეს ვაკეთებ, ეზოს ვაწყობ. უკვე შევიძინე მიწა და გეგმაშია ღვინის მცირე საოჯახო მეურნეობის მოწყობა, რომელიც არტ ვილა გარიყულაზე იქნება მიბმული“, - აღნიშნა ჯაბა მუჯირმა.

საქართველოს ბანკი კი ამაზე გაჩერებას არ აპირებს და სოციალური მისიის მქონე პროექტების მხარდაჭერს მომავალშიც აქტიურად გეგმავს.

„სოციალური პასუხისმგებლობის მქონე პროექტების მხარდაჭერა საქართველოს ბანკის უცვლელი პრიორიტეტია. მოხარული ვართ, რომ გვაქვს შესაძლებლობა, ჩვენი წვლილი შევიტანოთ იმ საწარმოების განვითარებაში, რომლებიც სოციალური მისიით გამოირჩევიან და მიზნად უფრო ინკლუზიური, ეკომეგობრული და გენდერულად თანასწორი საზოგადოების ჩამოყალიბებას ისახავენ. გვსურს, მეტ მსგავს ინიციატივას დავუჭიროთ მხარი, რათა ხელი შევუწყოთ სოციალური მეწარმეობის განვითარებას და სოციალურ პრობლემებზე ცნობიერების ამაღლებას. ჩვენ გვჯერა, რომ ჩვენი, საუკეთესო გადაწყვეტილებაა, წავახალისოთ მსგავსი ინიციატივები. ამიტომაც არ ვჩერდებით და ვაგრძელებთ უფრო მეტი ადამიანის, სფეროს, თუ ბიზნესის მხარდაჭერას“,- განაცხადა საქართველოს ბანკის CSR მიმართულების ხელმძღვანელმა, თამარ გოჩაშვილმა.

(R)