ქართულ ბანკებში უცხო ქვეყნის მოქალაქეთა დეპოზიტებმა ისტორიულ მაქსიმუმს მიაღწია. სებ-ის მიერ გამოქვეყნებული ანგარიშიდან ირკვევა, რომ ივლისის მდგომარეობით, უცხოელი ფიზიკური პირების ანგარიშებზე არსებული თანხა 5 მილიარდ ლარს აჭარბებს, რაც იანვარში არსებულ 3.90 მილიარდ ლარს მნიშვნელოვნად აჭარბებს.

2022 წლის 6 თვის მონაცემებით, არასაბანკო დეპოზიტების მოცულობით ლიდერი თიბისი ბანკია, მეორე ადგილს ვადიანი და მოთხოვნამდე დეპოზიტების მაღალი მაჩვენებლით საქართველოს ბანკი იკავებს. ჯამში მხოლოდ ამ ორ ბანკს არასაბანკო დეპოზიტების საერთო მოცულობის თითქმის 42% უჭირავს. ეროვნული ბანკის მონაცემებით, უცხო ქვეყნის მოქალაქეებიც ყველაზე მეტ დეპოზიტს მსხვილ ბანკებში ინახავენ. „საქართველოს ბანკში“ განთავსებულია 2.14 მილიარდი ლარი, „თიბისიში“ თითქმის 2 მლრდ ლარი, „ლიბერთი ბანკში“ კი 123 მილიონი ლარია.

არასაბანკო დეპოზიტების მოცულობით Top3 ბანკის მაჩვენებლები ასეთია:

თიბისი ბანკი - 5,213,542,696 ლარის ვადიანი დეპოზიტები, 5,569,002,586 ლარის მოთხოვნამდე დეპოზიტები. 

საქართველოს ბანკი - 3,643,100,416 ლარის ვადიანი დეპოზიტები, 2,685,086,645 ლარის მოთხოვნამდე დეპოზიტები;

ლიბერთი ბანკი - 1,179,448,704 ლარის ვადიანი დეპოზიტები, 363,896,834 ლარის მოთხოვნამდე დეპოზიტები.

ეროვნული ბანკის ანგარიშში არ არის დეტალურად აღნიშნული, რომელი ქვეყნების მოქალაქეებს ეკუთვნით აღნიშნული დეპოზიტები, თუმცა სებ-ის 2021 წლის ანგარიშის მიხედვით, ყველაზე მეტი დეპოზიტი საქართველოში რუსეთის ფედერაციის მოქალაქეებს ჰქონდათ და მათი წილი საერთო მაჩვენებლის 14%-ს შეადგენდა.

საბანკო სექტორში განთავსებული არასაბანკო დეპოზიტების მოცულობამ 2022 წლის პირველი აგვისტოსათვის 38.75 მლრდ ლარი შეადგინა, რაც 486.28 მლნ ლარით, ანუ 1.27%-ით მეტია პირველი ივლისისათვის არსებულ მაჩვენებელზე (გაცვლითი კურსის ეფექტის გარეშე 5.00%-ით მეტი). ივლისში, წინა თვესთან შედარებით, ადგილი ჰქონდა ვადიანი დეპოზიტების შემცირებას 171.25 მლნ ლარით, ანუ 1.09%-ით (გაცვლითი კურსის ეფექტის გარეშე 1.93%-ით გაიზარდა), ხოლო მოთხოვნამდე დეპოზიტები 657.53 მლნ ლარით, ანუ 2.92%-ით გაიზარდა (გაცვლითი კურსის ეფექტის გარეშე გაიზარდა 7.14%-ით).