განათლების ხელშეწყობის მიზნით, საქართველოს ბანკმა მოსწავლეებს საქართველოს მასშტაბით კიდევ 3 საჯარო სკოლაში: ზემო ნიქოზის, ამბროლაურის #1 და ოზურგეთის #4 საჯარო სკოლებში სულ ახლახან ახალი სასწავლო სივრცეები - იდეათეკები შესთავაზა.

პროექტის მთავარ მიზანი რეგიონების საჯარო სკოლებში, განსაკუთრებით კი საოკუპაციო ხაზისა და საზღვრისპირა სოფლებში თანამედროვე რესურსებზე წვდომის გაზრდა და ფორმალური თუ არაფორმალური განათლების ხელშეწყობაა, ასევე პროექტის მიზანია, რომ სწავლის პროცესი კიდევ უფრო საინტერესო და ინტერაქციული გახდეს. არსებული გამოწვევების გათვალისწინებით საქართველოს ბანკმა არაფორმალური განათლებისთვის შექმნილი სივრცეები დისტანციურ რეჟიმში ფუნქციურად კიდევ უფრო მეტად დატვირთა. იდეათეკა ერთ სივრცეში აერთიანებს ისეთ აქტივობებს, როგორიცაა: ყოველდღიური გაკვეთილები, ჯგუფური პრეზენტაციები, ონლაინ შეხვედრები მოსწავლეებისთვის საინტერესო სპიკერებთან და სხვა.

როგორც განათლების სპეციალისტი თამარ მოსიაშვილი აღნიშნავს, კერძო სექტორის და ზოგადსაგანმანათლებლო დაწესებულების თანამშრომლობა განსაკუთრებით მნიშვნელოვანია და მისი მნიშვნელობა იზრდება, როდესაც საჯარო სკოლების ინფრასტრუქტურის გაუმჯობესებაში მონაწილეობენ.

„ოკუპირებულ ტერიტორიებთან მდებარე, მაღალმთიან რეგიონში არსებულ სკოლებში მოხდა ინფრასტრუქტურის სრული გაუმჯობესება, ვგულისხმობ იდეათეკებს, სადაც აღჭურვილობები და წიგნები შევიდა, რაც თავისთავად ძალიან მნიშვნელოვანია, ასევე მნიშვნელოვანია ის, რომ ბავშვებს საგანმანათლებლო რესურსებთან ხელმისაწვდომობა გაეზარდათ, საგანმანათლებლო რესურსებში იგულისხმება წიგნები, უწყვეტი ინტერნეტი, გარდა ამისა ბავშვებისთვის გაჩნდა თავისუფალი სივრცე, სადაც შეიძლება ისინი შეიკრიბონ, სხვადასხვა საკითხებზე იმსჯელონ და საგანმანათლებლო პროექტები განახორიციელონ.

ზოგადად განათლების შედეგებზე გავლენას ბევრი რამ ახდენს და მათ შორისაა საგანმანათლებლო რესურსების ხელმისაწვდომობა. ძალიან კარგი ამბავია, რომ სკოლებში სადაც საქართველოს ბანკმა იმუშავა, ერთი ძალიან მნიშვნელვანი პრობლემა, როგორიც არის იდეათეკა, რომელიც თავისთავად ძალიან მდიდარ ბიბლიოთეკას წარმოადგენს, გადაჭრილია და ვფიქრობ, რომ ეს იდეათეკები კარგად იმუშავებს.

საქართველოს ბანკის მხარდაჭერამ შექმნა ის რესურსი, რომელიც სკოლებს იმ საგანმანათლებლო დანაკარგების შემცირებაში დაეხმარებათ, რომელიც სამწუხაროდ საქართველოში და სხვა ქვეყნებში პანდემიამ მოგვიტანა“, - აღნიშნა თამარ მოსიაშვილმა.

საქართველოს ბანკმა პროექტის განხორციელება გასულ წელს დაიწყო. მის ფარგლებში ჯამში უკვე 7 სკოლაში მოეწყო მულტიფუნქციური სივრცე, რომელიც მოსწავლეებისა და მასწავლებლების საყვარელ ადგილად იქცა. ეს სკოლებია: გორის მუნიციპალიტეტის სასაზღვრო სოფლებში დიცში, ხურვალეთში, ზემო ნიქოზში, თეოფანე დავითაიას სახელობის ქალაქ ფოთის #1 საჯარო სკოლაში, თბილისის 146-ე, ამბროლაურის #1 და ოზურგეთის მე-4 საჯარო სკოლებში უკვე მოეწყო. სულ მალე ამ ჩამონთვალს კიდევ 2: ახალქალაქის მე-3 და დუისის საჯარო სკოლა შეემატება.

„ჩვენ ვაგრძელებთ იდეათეკების პროექტს და მოხარული ვართ, რომ მოგვეცა შესაძლებლობა კიდევ 3 რეგიონში გაგვეხსნა მულტიფუნქციური სივრცე. შემოდგომაზე დამატებით 2 საჯარო სკოლაში ვგეგმავთ იდეათეკის გახსნას. ჩვენი მიზანია, ამ პროექტის ფარგლებში წლის განმავლობაში მინიმუმ ერთ საზღვრისპირა სოფელში მოეწყოს მსგავსი სივრცე და წელს მოეწყო კიდეც ზემო ნიქოზში. იდეათეკის პროექტის მეშვეობით ჩვენ გვსურს უფრო მეტ მოსწავლეს მივცეთ არაფორმალურ განათლებასა და თანამედროვე ტექნოლოგიებზე წვდომა. 2500-მდე მოსწავლე უკვე აქტიურად იყენებს აღნიშნულ სივრცეებში განთავსებულ რესურსს, როგორიცაა ინტერნეტი, კომპიუტერები, პროექტორები, მრავალფეროვანი ბიბლიოთეკა თუ სხვა შემეცნებითი ხელსაწყოები. იდეათეკები მნიშვნელოვნად უწყობს ხელს სასწავლო პროცესის გამრავალფეროვნებას და მოსწავლეთა მეტ ინტერაქციულობასაც. ჩვენ არ ვჩერდებით და ვაგრძელებთ ამ და სხვა საგანმანათლებლო პროექტების განხორციელებას, რათა მეტმა ახალგაზრდამ შეძლოს საკუთარი პოტენციალის მაქსიმალურად ათვისება“, - აცხადებენ საქართველოს ბანკში.

(R)