საქართველოს ბანკი ქვეყნისათვის მნიშვნელოვანი პროექტების მხარდაჭერას განაგრძობს. ბანკთან პარტნიორობით წიგნისა და საავტორო უფლებების დღეს თბილისმა ერთი წლით წიგნის მსოფლიო დედაქალაქის სტატუსი გადმოიბარა. ოფიციალური ღონისძიება თბილისის მერიისა და იუნესკოს ერთობლივი პროექტის ფარგლებში „აბრეშუმის ქარხანაში“ ოფიციალურად 23 აპრილს გაიხსნა.

ღონისძიებაზე წარმოდგენილი იყო კოსტიუმირებული პერფორმანსი - „ათი ცოცხალი სურათი ქართული ლიტერატურიდან“, რომელიც აერთიანებს ქართული მწერლობის ისტორიის ათ სცენას ადრექრისტიანული ხანიდან მეოცე საუკუნემდე. გახსნის მეორე ნაწილი კი თანამედროვე ავტორებს დაეთმო. წარმოდგენილი იყო ერთგვარი ფოტო-აუდიო პროექტი ცამეტი ქართველი ავტორის მონაწილეობით. ღონისძიების სტუმრებმა გურამ დოჩანაშვილის შესახებ მოკლე ჩანახატიც იხილეს.

წიგნის მსოფლიო დედაქალაქის სტატუსის გადმობარებასთან დაკავშირებით მთელი წლის განმავლობაში არაერთი მნიშვნელოვანი ღონისძიებაა დაგეგმილი. მათ შორის, საერთაშორისო ბაზრობები და ფესტივალები, საერთაშორისო კონფერენცია, რაც იქნება ძალიან კარგი შესაძლებლობა ქართველი მწერლებისთვისა და გამომცემლებისთვის, დაამყარონ ახალი კონტაქტები, ასევე უცხოელებისთვის, რათა უკეთ გაიცნონ ქართული კულტურა და ქვეყანა.

„თბილისი – წიგნის მსოფლიო დედაქალაქის” დირექტორი, ნინია მაჭარაშვილი გვიყვება, რომ, ბევრი ქალაქი, მრავალი წელია ცდილობს წიგნის მსოფლიო დედაქალაქის სტატუსის მოპოვებას. თბილისმა კი ეს სტატუსი პირველივე მცდელობაზე მოიპოვა და 2019 წლის 7 ოქტომბერს გამოვლინდა, რომ, 15 პრეტენდენტს შორის, საქართველომ გაიმარჯვა.

„გვსურს, რომ წიგნის მსოფლიო დედაქალაქი იყოს ყველასთვის, ასაკობრივი კატეგორიისა და ინტერესების მიუხედავად. ვაპირებთ, დავაარსოთ საბავშო წიგნის ფესტივალი და გავხსნათ საბავშვო ბიბლიოთეკა. წიგნისა და კითხვის პოპულარიზაციასთან დაკავშირებული ბევრი პროექტი იგეგმება მოზარდებისთვისაც, მათ შორისაა, საგანმანათლებლო და სახალისო, შემეცნებით-გასართობი პროექტები. ყველასთვის საინტერესო იქნება წიგნების ფლიმარკეტები. ზაფხულის განმავლობაში, რამდენჯერმე, ავტორებიც გამოიტანენ საკუთარ თუ მათთვის საყვარელი მწერლების წიგნებს და სხვა მონაწილეებთან ერთად გაყიდიან. საქართველოს სხვადასხვა რეგიონიდან მოსწავლეებისა და სტუდენტებისთვის მოეწყობა ბანაკები, სადაც ლიტერატურასა და კინოზე ვორკშოპები და სემინარები გაიმართება. გვაქვს ასევე დაგეგმილი აუდიოწიგნების პროექტიც, რომელიც, უმთავრესად, განსაკუთრებული საჭიროების მქონე ადამიანებზე იქნება მორგებული და სხვა მრავალი პროექტი.

ასეთ მნიშვნელოვან პროექტში, საქართველოს ბანკის თანამონაწილეობა, ჩვენთვის უნიკალური საშუალებაა. მთელი გუნდი, არამხოლოდ ფინანსურად, არამედ ადამიანური რესურსის თვალსაზრისითაც გვეხმარება, რაც ძალიან დასაფასებელია. მათთან ერთად ჩვენ რამდენიმე მნიშვნელოვან პროექტს ვგეგმავთ, რომლებშიც ყველა დაინტერესებული ადამიანი იქნება ჩართული. დიდ მადლობას ვუხდი მათ ამ მხარდაჭერისთვის“, - განაცხადა ნინია მაჭარაშვილმა.

„საქართველოს ბანკისთვის მნიშვნელოვანია ისეთი პროექტების მხარდაჭერა, რომელიც ხელს უწყობს ახალგაზრდებში კითხვის წახალისებასა თუ განათლების ამაღლებას. ჩვენ საქართველოს ბანკი ვართ, ჩვენთვის ყველაზე სწორი გადაწყვეტილებაა წვლილი შევიტანოთ ქვეყნისთვის მნიშვნელოვან მიღწევებში, ისეთში როგორიცაა იუნესკოს მიერ თბილისის წიგნის მსოფლიო დედაქალაქად დასახელება. ეს ღირშესანიშნავი სტატუსია მთელი ქვეყნისთვის, საქართველოს კულტურის საერთაშორისო დონეზე ცნობადობის ზრდისთვის. ამასთან, ტურიზმის განვითარებასაც უწყობს ხელს, რადგან მსოფლიოს მასშტაბით ეს ღონისძიება ძალიან ბევრ სტუმარს იზიდავს. ჩვენ არ ვჩერდებით და ვაგრძელებთ საინტერესო და მნიშვნელოვანი პროექტებისგანხორციელებას“,- აცხადებენ საქართველოს ბანკში.

World Book Capital (წიგნის მსოფლიო დედაქალაქი) ფართომასშტაბიანი პროექტია, რომელიც 2001 წელს, UNESCO-ს გენერალური კონფერენციის გადაწყვეტილებით დაარსდა. პირველი დედაქალაქი მადრიდი იყო, შარშან კი წიგნის დედაქალაქი კუალალუმპური გახდა, რომელმაც, მსოფლიო პანდემიის მიუხედავად, პროექტი წარმატებით განახორციელა. პროექტი მიზნად ისახავს წიგნისა და კითხვის პოპულარიზაციას, ხელს უწყობს წიგნის ინდუსტრიისა და მასთან დაკავშირებული ყველა სფეროს განვითარებას, თანამედროვე ავტორების, მთარგმნელების, ბიბლიოთეკების, გამომცემლების ხელშეწყობას.

წიგნის მსოფლიო დედაქალაქის სტატუსის გადმობარების საზეიმო ღონისძიებას ესწრებოდნენ იუნესკოს წიგნის მსოფლიო დედაქალაქის მენეჯერი, იუნესკოს კეთილი ნების ელჩი, გამომცემელთა მსოფლიო ასოციაციის გენერალური მდივანი, ამავე ასოციაციის პრეზიდენტი, 2020 წლის წიგნის მსოფლიო დედაქალაქის მასპინძელი ქალაქის, კუალა ლუმპურის მერის მოადგილე; პროექტის დირექტორი, გვადალახარას წიგნის საერთაშორისო გამოფენის დირექტორი, ათენის წიგნის მსოფლიო დედაქალაქის კოორდინატორი, ასევე, დიპლომატიური კორპუსის პარტნიორი ორგანიზაციების, გამომცემლობების წარმომადგენლები და მწერლები.

იუნესკოს პროექტი „თბილისი - წიგნის მსოფლიო დედაქალაქი“ თბილისის მერიის ინიციატივითა და საქართველოს ბანკის მხარდაჭერით ხორციელდება.

(R)