გასულ კვირაში, „საქართველოს ბანკის“ მიერ უცხო ქვეყნის მოქალაქეებისთვის ანგარიშების დაბლოკვის 200-მდე შემთხვევა დადასტურდა, ამის შესახებ ინფორმაციას რუსი ბლოგერი ნიკოლაი ლევშიცი ავრცელებს.

საქართველოს ბანკის მიერ მომხმარებლებისთვის გაგზავნილ შეტყობინებაში ეწერა: „გაცნობებთ, რომ ბანკის გადაწყვეტილების და შიდა პოლიტიკის საფუძველზე, თქვენი ანგარიში დაიხურება ხუთი სამუშაო დღის განმავლობაში. გთხოვთ, გააუქმოთ ანგარიშები ვადამდე“.

საკითხთან დაკავშირებით „საქართველოს ბანკმა“ ოფიციალური პოზიცია დღეს გააჟღერა, „კომერსანტი“ განცხადებას უცვლელად გთავაზობთ:

„გვინდა ხაზი გავუსვათ, რომ გადაწყვეტილება უკავშირდება კლიენტის უჩვეულო ან და მაღალი რისკის მატარებელ აქტივობას/ქცევას. კონკრეტულად კი, თუ ანგარიში გამოყენებულია სატრანზიტო მიზნით ან წარმოადგენს უმოქმედო ანგარიშს. ბანკის შიდა პოლიტიკის საფუძველზე მიღებული გადაწყვეტილება ასევე ეფუძნება ისეთ პარამეტრებს როგორიცაა: მაღალი რისკის მატარებელი ქვეყნების კლასიფიკაცია, მასთან დაკავშირებული რისკები და ა.შ. აქვე გვინდა განვმარტოთ, რომ ბანკს აქვს უფლება, საკუთარი შეხედულებისამებრ მიიღოს გადაწყვეტილება მომხმარებლის ანგარიშის დახურვასთან დაკავშირებით. რადგან „კომერციული ბანკების საქმიანობის შესახებ კანონი“ საქართველოში მოქმედ კომერციულ ბანკებს ანიჭებს სრულ უფლებამოსილებას, კლიენტებს დასაბუთების გარეშე უარი უთხრან მომსახურებაზე ან დაუხურონ ანგარიშები“, - ნათქვამია საქართველოს ბანკის მიერ გავრცელებულ განცხადებაში.