“გარბენი უკრაინისთვის” 5 ივნისს გაიმართება, ამის შესახებ საქართველოს ბიზნეს ასოციაციასა და  სპორტის, ტურიზმისა და ახალგაზრდობის საერთაშორისო ფონდს  შორის ურთიერთთანამშრომლობის მემორანდუმის გაფორმების დროს გახდა ცნობილი. მემორანდუმს ხელი მოაწერეს საქართველოს სპორტის, ტურიზმისა და ახალგაზრდობის საერთაშორისო ფონდის პრეზიდენტმა, ტარიელ ხეჩიკაშვილმა და საქართველოს ბიზნეს ასოციაციის პრეზიდენტმა, სოსო ფხაკაძემ.

დოკუმენტი თანამშრომლობას სხვადასხვა ღონისძიებების ფარგლებში გულისხმობს. აღსანიშნავია, რომ პირველი პროექტი, რომელშიც მხარეები ერთობლივ მონაწილეობას მიიღებენ არის უკრაინის მხარდამჭერი ყველაზე დიდი საქველმოქმედო სპორტული ღონისძიება საქართველოში, „გარბენი უკრაინისთვის“.

აღსანიშნავია, რომ უკრაინაში ომის დაწყებიდან დღემდე ამ მასშტაბის საქველმოქმედო სპორტული ღონისძიება საქართველოში არ ჩატარებულა. გარბენში მონაწილეობას მიიღებენ უკრაინის ის მოქალაქეებიც, რომლებიც საქართველოში ომის გამო დროებით იმყოფებიან.

„დღეს გაფორმდა ურთიერთთანამშრომლობის მემორანდუმი საქართველოს ბიზნეს ასოციაციასა და სპორტის, ტურიზმისა და ახალგაზრდობის საერთაშორისო ფონდს  შორის. ჩვენთვის ძალიან მნიშვნელოვანია ჯანსაღი ცხოვრების წესისა და ზოგადად სპორტის მხარდაჭერა, რაც ძალზედ მნიშვნელოვანია ახალგაზრდებისა და ზოგადად ადამიანის ჯანმრთელობისთვის. ჩვენი თანამშრომლობის პირველი პროექტი იქნება „გარბენი უკრაინისთვის“, რომელშიც მონაწილეობას შეძლებს ნებისმიერი მსურველი და ამ ღონისძიებიდან შემოსული თანხა სრულად გადაეცემა უკრაინელ ხალხს, რაც ამ რთულ ვითარებაში უკრაინული ოჯახების მნიშვნელოვანი მხარდაჭერა იქნება“ - განაცხადა საქართველოს ბიზნეს ასოციაციის პრეზიდენტმა, სოსო ფხაკაძემ.

საქველმოქმედო გარბენში მონაწილეობის ღირებულება 30  ლარია, შემოსული თანხა სრულად გადაირიცხება უკრაინელი ხალხის მხარდასაჭერად. ბილეთების შეძენა უკვე შესაძლებელია biletebi.ge-ზე.