საქართველოს საგარეო ვალმა მშპ-ის 60%-ს გადააჭრბა, კომერსანტი დაინტერესდა, რომელიმე სახელმწიფოს თუ ჰქონდა თუნდაც სიმბოლური დავალიანება საქართველოს მიმართ. ფინანსთა სამინისტროდან მიღბული წერილის თანახმად, 2021 წლის 15 ივნისის მდგომარეობით, სხვა სახელმწიფოების დავალიანება საქართველოს მიმართ $0.00-ს შეადგენდა.
ლოგიკურია, როდესაც პატარა სახელმწიფო ფულს დიდი სახელმწიფოსგან სესხულობს, როდესაც ღარიბ ქვეყანას მდიდარი ქვეყნის ვალი აქვს, თუმცა გამონაკლისებიც არსებობს. 2021 წლის 31 მაისის მდგომარეობით საქართველოს სომხეთის მიმართ $5.1 მლნ-ის ვალი გააჩნდა. სომხეთი კი როგორც ჯამური ეკონომიკით, ასევე 1 სულ მოსახლეზე შემოსავლით საქართველოზე ღარიბია. პანდემიამდელ პერიოდში 2019 წელს სომხეთის ნომინალური მშპ $13.7 მლრდ-ს შეადგენდა, საქართელოსი კი $17.5 მლრდ-ს. 1 სულ მოსახლეზე სომხეთს $4620 ჰქონდა, PPP დათვლით - $14 260. საქართველოს, შესაბამისად, $4700 და $15 660.
საქართველოს დანარჩენი სამი მეზობელი სახელმწიფოსიც მართებს: რუსეთის - $37.4 მლნ, თურქეთის $9.8 მლნ და აზერბაიჯანის - $5 მლნ. ამ შემთხვევაში სამივე ქვეყანა საქართველოზე მდიდარია, როგორც ჯამურად, ასევე 1 სულ მოსახლეზე შემოსავლით.
1 სულ მოსახლეზე დათვლით, საქართველოს დავალიანება, მასზე ღარიბი კიდევ 2 სახელმწიფოს: უკრაინისა და უზბეკეთის მიმართ გააჩნია, თუმცა ორივე შემთხვევაში კრედიტის მოცულობა მიზერულია და ჯამში $99 ათასს შეადგენს.
31 მაისის მდგომარეობით, სახელმწიფო საგარეო ვალის მოცულობა $8.039 მლრდ-ა, საიდანაც $7.552 მლდ მთავრობის ვალია, $487 მლნ კი ეროვნული ბანკის. მთავრობას ყველაზე მეტი - $5.423 მლრდ საერთაშორისო საფინანსო ინსტიტუტების მართებს, ევროობლიგაციების მოცულობა $500 მლნ-ის ტოლია, სახელმწიფოების მომართ არსებული დავალიანება კი $1.627 მლრდ-ს შეადგენს, ამ ვალის 93% სამ სახელმწიფოზე ნაწილდება: გერმანია - $734 მლნ, საფრანგეთი - $577 მლნ და იაპონია - $203 მლნ.
საგარეო ვალის გარდა მთავრობას 5.8 მლრდ ლარის შიდა ვალიც აქვს, რაც 31 მაისის კურსით $1.769 მლრდ-ია. ჯამში მთავრობისა და ეროვნული ბანკის ვალი $9.808 მლრდ-ია. მიუხედავად იმისა, რომ თუნდაც მხოლოდ პოსტსაბჭოთა სივრციდან საქართველოზე მცირე ეკონომიკა სომხეთს, ტაჯიკეთს, ყირგიზეთსა და მოლდოვას გააჩნიათ, კიდევ ორ სახელმწიფოში: უკრაინასა და უზბეკეთში 1 სულ მოსახლეზეა საქართველოზე მცირე შემოსავლები, არც ერთ მათგანს საქართელოს მიმართ 1 ცენტიც არ მართებს.