საქართველოს პრემიერ-მინისტრმა ირაკლი ღარიბაშვილმა დღეს გამართულ მთავრობის სხდომაზე განაცხადა, რომ საქართველოს მთავრობა წინა ხელისუფლების დროს შეძენილ ძვირადღირებულ ვერტმფრენს (Super Puma) გაყიდის და სანაცვლოდ 3 ახალ ვერტმფრენს შეიძენს, რომელიც სამაშველო და სხვა ოპერაციებისთვის გამოდგება. მისივე თქმით, ახალი ვერტმფრენების შეძენის თაობაზე მოლაპარაკებები მიმდინარეობს და პროცესში ფინანსთა სამინისტროც არის ჩართული.
პრემიერმა ასევე აღნიშნა, რომ დღეისთვის არსებული ყველა ვერტმფრენი აბსოლუტურად გამართულია და კარგ მდგომარეობაშია.
„ბატონი ვახტანგ გომელაურის უწყება ახლა აქტიურად მუშაობს სამი ახალი ვერტმფრენის შეძენის თაობაზე. იმის მიუხედავად, რომ ყველა ვერტმფრენი აბსოლუტურად გამართულია, კარგ მდგომარეობაშია, ჩვენ ამას ყოველთვის ძალიან დიდ ყურადღებას ვუთმობთ, ამის თაობაზე განხილვა გვქონდა. მოგეხსენებათ, რომ სახელმწიფოს ჰყავს ერთი ძვირადღირებული, ფუფუნებისთვის განკუთვნილი ვერტმფრენი, რომელიც ყოფილი პრეზიდენტისთვის იქნა შეძენილი წინა მთავრობის დროს და რამდენიმე ათეული მილიონი ევროა გადახდილი ამ ვერტმფრენში. ეს იყო ჩვენი გადაწყვეტილება, რომ ამ ვერტმფრენით არავინ არ ისარგებლა. აქვე, მინდა ხაზგასმით აღვნიშნო, რომ მიუხედავად იმ სპეკულაციებისა, რომ თითქოს ეს ვერტმფრენი გამოიყენება სამაშველო ოპერაციებში, ეს არის ტყუილი, მეგობრებო. რა თქმა უნდა, ჩვენ ამის თაობაზე გვქონდა განხილვა და მივიღეთ გადაწყვეტილება, რომ ახალ ვერტმფრენს გადავცემთ უკან მის გამომშვებ ქარხანას, ანუ გავყიდით და სანაცვლოდ, ჩვენ სამ ახალ ვერტმფრენს შევიძენთ, ისეთებს, როგორიც გამოგვადგება სამაშველო ოპერაციებში და სხვადასხვა ოპერაციებისთვისაც. ეს გადაწყვეტილება მიღებულია და ახლა უკვე აქტიური მოლაპარაკებები მიმდინარეობს. ამ პროცესში ფინანსთა სამინისტროც არის ჩართული,- აღნიშნა ირაკლი ღარიბაშვილმა.
შეგახსენებთ რომ Super Puma-ს ერთ-ერთი ვერტმფრენი, რომელიც სასაზღვრო პოლიციის ბალანსზე იყო და 2018 წელს ავარიულად ჩამოვარდა, დღემდე კახეთში, ართანას მთებშია, – აღნიშნულის შესახებ რეპორტაჟი “ტვ პირველმა” 2020 წლის 13 ივნისს მოამზადა. ხსენებული ვერტმფრენი უკვე 4 წელის შემდეგაც ავარიის ადგილზეა.
„ამერიკის ხმაზე“ 2012 წელის 19 დეკემბერს გამოქვეყნებულ სტატიაში ვკითხულობთ, რომ კონტრაქტის კრიტიკა საქართველოში დაიწყო მას შემდეგ, რაც თბილისში, „პუმა“ SA 330 განახლებული სალონით ჩამოიყვანეს, პრეზიდენტ სააკაშვილის მოწინააღმდეგეები ამტკიცებდნენ, რომ ვერტმფრენი ე.წ VIP სტუმრებისთვის და პირადად, სააკაშვილის გადაადგილებისთვის იყო შეძენილი. ამ ბრალდების საწინააღმდეგოდ, სააკაშვილი აცხადებდა, რომ ვინაიდან რუსეთი სანქციებით დაემუქრა ევროკოპტერს, კონტრაქტის გადასარჩენად და სუპერ პუმების ჩამოსაყვანად გადაწყდა, შვეულმფრენებს სამოქალაქო სალონი ჰქონოდათ.
სუპერ პუმების ანალოგიური სქემით იყო შეძენილი პრეზიდენტ სააკაშვილისთვის ამერიკული ბიზნეს-კლასის Gulfstream 450G. ამ ლაინერის საბაზრო ღირებულება 38 მილიონ დოლარს აღემატება.