ფინანასთა სამინისტრომ გამოაქვეყნა ანგარიში, სადაც მათ შორის გამოქვეყნებულია მონაცემები, თუ რა მოცულობის თანხას ედავებიან სახელმწიფოს როგორც ადგილობრივ, ისე საერთაშორისო არბიტრაჟებში.
კერძოდ, ანგარიშის თანახმად, ადგილობრივ სასამართლოებში ამ ეტაპზე მიმდინარე დავების სადავო თანხის ოდენობა შეადგენს დაახლოებით 565.5 მილიონ ლარს, რაც 2021 წლის მშპ-ს (60.23 მლრდ ლარი) 1%-ზე მცირედით ნაკლებია.
რაც შეეხება არბიტრაჟს, 2022 წლის 23 სექტემბრის მდგომარეობით საერთაშორისო არბიტრაჟებში 7 მიმდინარე დავის ფარგლებში სადავო თანხის პოტენციური მაქსიმალური ოდენობა შეადგენს დაახლოებით 2.81 მლრდ აშშ დოლარს (7.87 მლრდ ლარს), რაც 2021 წლის მშპ-ს 13%-ს შეადგენს.
„საქართველოს მთავრობა ყოველწლიურად გამოყოფს ასიგნებებს შესაძლო წაგებული საქმეებისთვის. გასულ წლებში წაგებული გადახდილი ფაქტობრივი თანხის ოდენობა იყო არაარსებითი, სავარაუდოდ, მოსარჩელეებისთვის ასანაზღაურებელი თანხების სიმცირის ან/და საანგარიშო წელს დაუსრულებელი დავების გამო, რაც განპირობებული იყო სხვადასხვა ზოგადი გარემოებით, მაგალითად, COVID-19-ის პანდემიამ შეანელა სასამართლოების მუშაობა 2020 წელს,“- ვკითხულობთ ანგარიშში.
ამასთან, ფინანსთა სამინისტროს მიერ გამოქვეყნებული მონაცემების თანახმად, 2019 წლიდან 2022 წლის აგვისტოს ჩათვლით პერიოდში, სასამართლო დავებში სახელმწიფოს მიერ გადახდილი თანხა ჯამში, 17,37 მლნ ლარს შეადგენს. წლების მიხედვით კი, დავების ფარგლებში საქართველოს მთავრობის მიერ გადახდილი თანხები ასე გამოიყურება:
2019 წელი - 3.67 მლნ ლარი;
2020 წელი - 3.45 მლნ ლარი;
2021 წელი - 4.98 მლნ ლარი;
2022 წლის აგვისტოს მდგომარეობით - 5.27 მლნ ლარი.
„მოსალოდნელია სასამართლო დავებზე ფაქტობრივად გადახდილი თანხების ზრდადი ტენდენციის შენარჩუნება, ეს არ ნიშნავს, რომ სახელმწიფო პროპორციულად უფრო მეტ საქმეს აგებს ვიდრე მანამდე. ასეთი ტენდენცია შეინიშნება სხვა ქვეყნებშიც, სპეციალიზირებული იურიდიული კომპანიების რაოდენობის ზრდისა და ამ დრომდე აკუმულირებული მსხვილი დავების ფონზე,“- აღნიშნულია ანგარიშში.