დარგობრივი ეკონომიკისა და ეკონომიკური პოლიტიკის კომიტეტის თავმჯდომარე და ევროპასთან ინტეგრაციის კომიტეტის წევრი დავით სონღულაშვილი პრაღაში, ევროკავშირის ეროვნული პარლამენტების ევროპულ საქმეთა კომიტეტების კონფერენციაში მონაწილეობდა. ინფორმაციას პარლამენტის პრესსამსახური არცელებს.

კონფერენციაზე (COSAC) სიტყვით გამოსვლისას მან საქართველოს სახელით, უკრაინის ტერიტორიული მთლიანობისა და სუვერენიტეტის მიმართ ურყევი მხარდაჭერა გამოხატა.

„პირველ რიგში, ჩვენი ქვეყნის სახელით გამოვხატავ სოლიდარობას, ჩვენს უპირობო მხარდაჭერას უკრაინის და უკრაინელი ხალხის მიმართ. რუსეთის აგრესიას რა შედეგებიც ახლავს თან, ჩვენმა ქვეყანამ კარგად იცის. დღემდე, საქართველოს ტერიტორიის 20% რუსეთის მიერაა ოკუპირებული! ეს უნდა დასრულდეს! აღნიშნულთან დაკავშირებით, ჩვენი მხრიდან მხოლოდ ერთი პასუხი გვაქვს, ეს არის იგივე პასუხი, რაც გვქონდა საქართველოში რუსეთის შეჭრაზე: ჩვენ მკაცრად ვგმობთ რუსეთის შეჭრას უკრაინაში და მისი რეგიონების უკანონო ანექსიას“, - განაცხადა კომიტეტის თავმჯდომარემ.

დავით სონღულაშვილმა, თავის გამოსვლაში ხაზი გაუსვა საქართველოს ევროკავშირში გაწევრიანების მნიშვნელობას.

„ჩვენ გვინდა ეს ახალი შესაძლებლობა (ევროპული პერსპექტივა) გამოვიყენოთ და უკრაინასთან და მოლდოვასთან ერთად გავხდეთ ევროკავშირის წევრი ქვეყანა. იმისათვის, რომ: მოხდეს დაკავშირებადობის უნარის განვითარება ევროკავშირსა და საქართველოს შორის, განსაკუთრებით შავი ზღვის რეგიონში, ხელი შეეწყოს ევროპის ენერგეტიკული უსაფრთხოების განმტკიცებას და ბაზრების დივერსიფიცირებას, სტაბილურობისა და ენერგომდგრადობის უზრუნველსაყოფად. მჯერა, წარმატება სანდო პარტნიორობაზე დაფუძნებით მიიღწევა და დიდი გამარჯვება მხოლოდ ასეა შესაძლებელი!,“ - აღნიშნა პარლამენტის წევრმა.

COSAC-ის პლენარულ სხდომაზე, დავით სონღულაშვილმა მიმართვა უკრაინის მხარდასაჭერი სიტყვებით დაასრულა და იმედი გამოთქვა, რომ თავისუფლების მოყვარე ერი გამარჯვებას მალე იზეიმებს.

„საქართველოს მხარდაჭერა უკრაინისადმი უპირობო და ურყევია. ჩვენ ვდგავართ უკრაინელი ხალხის გვერდით, მიუხედავად იმისა, რომ საქართველო თავად არის დიდი საფრთხის წინაშე, რადგან ჩვენი ქვეყნის ისტორიული რეგიონები დიდი ხანია რუსეთს აქვს ოკუპირებული. ჩვენი სახელმწიფო, ქართველი და უკრაინელი ხალხის სახელით ამ გზიდან გადახვევას არ აპირებს. მჯერა, თავისუფლების მოყვარე ერი და ჩვენი მეგობარი უკრაინა, გამარჯვებას მალე იზეიმებს!“, - განაცხადა დავით სონღულაშვილმა.

პრაღაში გამართულ ევროკავშირის ეროვნული პარლამენტების ევროპულ საქმეთა კომიტეტების კონფერენციაში (COSAC) მონაწილეობას იღებენ საქართველოს პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი და დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი.

სხდომაში ევროკავშირის 27 წევრი სახელმწიფოს და კანდიდატი ქვეყნების პარლამენტების წევრები და ევროკავშირის ინსტიტუტების წარმომადგენლები მონაწილეობენ.

საქართველოს დელეგაცია კონფერენციაში ევროკავშირის თავმჯდომარე ქვეყნის, ჩეხეთის რესპუბლიკის და საპრეზიდენტო ტრიოს სპეციალური მოწვევით მონაწილეობს.