საქართველოს 4 ზამთრის სათხილამურო კურორტია - გუდაური, მესტია, ბაკურიანი და გოდერძი. თუმცა წელს მხოლოდ ორი მათგანის ხელოვნური გათოვლიანება მოხდება. მართალია, ზამთრის საკურორტო სეზონის გახსნის თარიღი ჯერჯერობით ისევ უცნობია, თუმცა მთის კურორტების განვითარების კომპანიაში ამბობენ, რომ ხელოვნური გათოვლიანებისთვის ასევე ტბები უკვე მზადყოფნაშია.
ცნობისათვის, გუდაურის ხელოვნური ტბის პროექტი 2018 წლის ბოლოს უნდა დასრულებულიყო, თუმცა ინფრასტრუქტურის სრულად მოწყობა მხოლოდ 2020 წლისთვის მოხერხდა. მთის კურორტების განვითარების კომპანიაში ამბობენ, რომ ტბა წელს 5 კმ სათხილამურო ტრასას გაათოვლიანებს. ამ ეტაპზე პროცესის პირველი და მეორე ფაზა მიმდინარეობს.
„გუდაურში დასრულებულია და სრულყოფილად ფუნქციონირებს წყლის ხელოვნური რეზერვუარი ანუ ტბა - ტბა არის 96 000 კუბური მეტრი . გუდაურში ასევე სრულყოფილად ფუნქციონირებს გათოვლიანების სისტემების როგორც პირველი, ასევე მერე ფაზა . ხელოვნური გათოვლიანების სისტემები ჯამში 5 კმ- სათხილამურო ტრასას ათოვლიანებს", - განაცხადეს კომპანიაში.
რაც შეეხება ბაკურიანს აქაც პროცესი მიმდინარეა და ორ ტრასაზე მონტაჟდება ხელოვნური გათოვლიანების სისტემა.
„ბაკურიანში 2015 წელს დაიწყო ხელოვნური გათოვლიანების სისტემის ფუნქციონირება, რომელიც გახლდათ პირველი ფაზა . მსოფლიო ჩემპიონატისთვის აუცილებელია სათხილამურო ტრასაზე იყოს ხელოვნური თოვლი, სწორედ ამიტომ გასულ წელს დაემატა 1200-მეტრიანი სათხილამურო გზის გათოვლიანება . ახლა კი აქტიურად მიმდინარეობს მესამე ფაზა - ორ სათხილამურო ტრასაზე მონტაჟდება ხელოვნური გათოვლიანების სისტემები", - აცხადებენ მთის კურორტების განვითარების კომპანიაში.
შეგახსენებთ, გუდაურში ტბის ინფრასტრუქტურის მოწყობა 2017 წელს დაიწყო. პროექტირება-მშენებლობისთვის საქართველოს მთავრობამ 11 388 298 ლარი გამოყო. პროექტის ავტორები ამბობდნენ, რომ ხელოვნური ტბა გუდაურში სეზონის უფრო ადრე გახსნას შეუწყობს ხელს, რადგან ტბა ხელოვნური გათოვლიანებისთვის არის საჭირო. ხელოვნური გათოვლიანება კი ბუნებრივი კლიმატური პირობებისგან დამოუკიდებლობის საშუალებას იძლევა, თუმცა ამ დრომდე ჯერ კიდევ უცნობია, როდის გაიხსნება ზამთრის ტურისტული სეზონი ოფიციალურად.
წყარო: ,,ბიზნესპრესნიუსი"