საქართველოს უნივერსიტეტის რექტორის, კონსტანტინე თოფურიას განცხადებით, ბოლო დღეებში მათ წინააღმდეგ სიცრუეზე აგებული კამპანია მიზნად ისახავს უნივერსიტეტის, მისი სტუდენტების, ასევე, იმ ღირებულებების დისკრედიტაციას, რასაც წლებია ემსახურებიან.

კონსტანტინე თოფურიას განცხადებით, ტყუილია მმართველი პარტიის ლიდერების განცხადებები, რომ თითქოს გიული ალასანიას საქართველოს უნივერსიტეტი ერთ ლარად გადაეცა.

მისივე თქმით, გიული ალასანიამ და მანანა სანაძემ უნივერსიტეტი 2004 წელს ნულიდან შექმნეს. რექტორი ამბობს, რომ შენობები საჯარო აუქციონზე, დაახლოებით 4 მილიონ ამერიკულ დოლარად შეიძინეს და აღნიშნული თანხა საბანკო სესხით მიიღეს.

ცილის წამებისთვის, დეზინფორმაციისთვის და საქმიანი რეპუტაციის შელახვისთვის, ბატონების ირაკლი კობახიძის და ირაკლი ღარიბაშვილის წინააღმდეგ დღეს შეგვაქვს სარჩელი თბილისის საქალაქო სასამართლოში. ყოველივე ეს კეთდება იმისთვის, რომ ვერავინ შეძლოს ახლა და მომავალში, ჩვენს სტუდენტებს მოაძახოს, რომ თითქოს მათი უნივერსიტეტი რაიმე კორუფციული გარიგებით შექმნა. ვწუხვართ, რომ ხელისუფლება მოქცეულია იმ იდეოლოგიური პროპაგანდის ტყვეობაში, რასაც პუტინის პროპაგანდისტები დიდი ხანია ავრცელებენ, - თქვა უნივერსიტეტის რექტორმა.

რექტორის განცხადებით, საქართველოს უნივერსიტეტის სტუდენტები დემოკრატიულ ღირებულებებზე აღზრდილი ახალგაზრდები არიან, რომელთა მართვა და ბრმა იარაღად გამოყენება შეუძლებელია.