საქართველოს ხელოვნების სასახლე - კულტურის ისტორიის მუზეუმი ორი ცნობილი მხატვრული ტილოს შეძენას გეგმავს, რომელიც 1921 წლამდე საქართველოში ინახებოდა, თუმცა დღეს ისინი გასაყიდად ლონდონის ცნობილი საიტ - www.1stdibs.com-ზეა გასაყიდად განთავსებული.
როგორც ირკვევა, მუზეუმი გეგმავს შეიძინოს „მოსე და ეგვიპტის პირველი სასწაული“, რომელიც მიეკუთვნება Arcangelo di Jacopo del Sellaio -ს ნამუშევარს (იტალიური სკოლა, დაახ. 1441 - 1493). დეკორატიულ ჩარჩოზე იკითხება წარწერა AVE MARIA GRATIA PLEN A DO (ზედა მონაკვეთი).ნახატის ზომებია : 40 x 107,5 სანტიმეტრი. ფასი - 16 519,52 დოლარი. მუზეუმის მხრიდან შესყიდვის ობიექტია ასევე მხატვრული ტილო „მადონა და ბავშვი“, ჯოვანი ბელინის სკოლა. ტილო მე-15 საუკუნეშია (1430-1516) შესრულებული და საიტზე მისი გასაყიდი ფასი - 19 569,05 დოლარია.
ამ შენაძენის გასაკეთებლად კი მუზეუმს გამარტივებული შესყიდვის უფლების მინიჭება სჭირდება.
როგორც სსიპ საქართველოს ხელოვნების სასახლის - კულტურის ისტორიის მუზეუმის გენერალური დირექტორის გიორგი კალანდიას მიერ სსიპ სახელმწიფო შესყიდვების სააგენტოს თავმჯდომარის ლევან რაზმაძისთვის მიწერილ წერილში წერია, მუზეუმი წარმოადგენს საქართველოს ერთ-ერთ უდიდეს სიძველეთსაცავს და მის უმთავრეს მოვალეობას წარმოადგენს როგორც მის ფონდებში დაცული მასალის დაცვა/მოვლა, ასევე ახლადშეძენილი უნიკალური მასალით მათი შევსება.
„სწორედ აღნიშნული ფუნქციის განსახორციელებლად მუზეუმი დადგენილი წესით მუდმივად ახორციელებს სამუზეუმო ექსპონატების შეძენას. ამჯერად მუზეუმმა უნდა მოახდინოს ცნობილ საიტზე - www.1stdibs.com გასაყიდად გამოტანილი ორი მხატვრული ტილო: „მოსე და ეგვიპტის პირველი სასწაული“ და „მადონა და ბავშვი“.
მსგავსი სახისა და პერიოდის ფერწერული ნამუშევარი საქართველოში დღემდე ცნობილი არაა. ხელოვნების სასახლე, რომელიც 1897-1921 წლებში წარმოადგენდა გრაფ ოლდენბურგისა და აგრაფინა ჯაფარიძის რეზიდენციას თბილისში, ინახავდა დასავლეთ ევროპული ხელოვნების არაერთ ძვირფას ნიმუშს, 1921 წელს ზუგდიდის დადიანების სასახლეების პირველმა დირექტორმა აკაკი ჭანტურიამ აღწერა გრაფ ოლდენბურგის სასახლე, რადგან იმ პერიოდისათვის შენობა უკვე ანდრია დადიანის საკუთრებას წარმოადგენდა. სწორედ ამ აღწერილობების საშუალებით ვიგებთ იმ უნიკალური ხელოვნების ნიმუშების შესახებ, რომლებიც საქართველოდან 1921 წელს გაიტანეს და დღეს ევროპის არაერთ კერძო კოლექციაშია განთავსებული.
შესაძენად გამოტანილი ორივე ნამუშევარი სწორედ ამ კოლექციის ნაწილს წარმოადგენს. მათი შესყიდვა, მუზეუმში განთავსება და მეცნიერული კვლევის ჩატარება უდიდესი წინგადადგმული ნაბიჯი იქნება როგორც ფონდების უძვირფასესი ხელოვნების ნიმუშების შევსების, ასევე მეცნიერული კვლევის განვითარების საქმეში.
გამომდინარე ზემოაღნიშნულიდან, გთხოვთ, „გამარტივებული შესყიდვის კრიტერიუმების განსაზღვრისა და გამარტივებული შესყიდვის ჩატარების წესის დამტკიცების თაობაზე“ სახელმწიფო შესყიდვების სააგენტოს თავმჯდომარის 2015 წლის 17 აგვისტოს #13 ბრძანებით დამტკიცებული წესის მე-3 მუხლის პირველი პუნქტის „ა“ ქვეპუნქტისა და მე-5 მუხლის პირველი პუნქტის საფუძველზე, მოგვცეთ თანხმობა, სახელმწიფო შესყიდვების გამარტივებული შესყიდვის საშუალებით განვახორციელოთ ზემოაღნიშნული ორი სურათის შეძენა“, - აღნიშნულია წერილში.