საქართველოში 91970 სასაქონლო ნიშანია რეგისტრირებული, აქედან მოქმედია 67 828. საქპატენტის განმარტებით, საქართველოში სასაქონლო ნიშნის რეგისტრაცია ხორციელდება ორი გზით, კერძოდ, ეროვნული პროცედურით, საქპატენტში შესაბამისი განაცხადის წარდგენის საფუძველზე და საერთაშორისო პროცედურით - „ნიშნების საერთაშორისო რეგისტრაციის შესახებ მადრიდის შეთანხმების ოქმის“ თანახმად. რეგისტრირებული 91970 ნიშნიდან 36486 - ეროვნული პროცედურით, 55484 - საერთაშორისო პროცედურით არის რეგისტრირებული. მოქმედი ნიშნებიდან 22853 ეროვნული პროცედურით, 44975 კი საერთაშორისო პროცედურითაა რეგისტრირებული.
როგორც „კომერსანტის“ მიერ საქპატენტიდან გამოთხოვილი ინფორმაციიდან ხდება ცნობილი სასაქონლო ნიშნების რეგისტრაციათა რაოდენობა ყოველწლიურად იკლებს. კერძოდ რეგისტრაციის ბოლო ხუთი წლის დინამიკა შემდეგია:
2018 წელი 4683 ნიშანი (1425 - ეროვნული პროცედურით, 3258 - საერთაშორისო პროცედურით)
2019 წელი 4557 ნიშანი (1569 - ეროვნული პროცედურით, 2988 - საერთაშორისო პროცედურით)
2020 წელი 4396 ნიშანი (1330 - ეროვნული პროცედურით, 3066 - საერთაშორისო პროცედურით)
2021 წელი 4119 ნიშანი (1370 - ეროვნული პროცედურით, 2749 - საერთაშორისო პროცედურით)
2022 წელი 4077 ნიშანი (1396 - ეროვნული პროცედურით, 2681 - საერთაშორისო პროცედურით)
რა
არის სასაქონლო ნიშანი?
სიმბოლო, რომელიც გამოიყენება მეწარმის მიერ წარმოებული საქონლის ან გაწეული მომსახურების საიდენტიფიკაციოდ და განასხვავებს მას კონკურენტის საქონლისა თუ მომსახურებისაგან.
რა
შეიძლება იყოს სასაქონლო ნიშანი?
• ნებისმიერი სიმბოლო, რომელიც გამოისახება გრაფიკულად და აქვს უნარი განასხვავოს ერთი საწარმოს მიერ წარმოებული საქონელი ან/და გაწეული მომსახურება, მეორე საწარმოს მიერ წარმოებული საქონლისა ან/და გაწეული მომსახურებისგან;
• სიმბოლო შეიძლება იყოს სიტყვა, სიტყვები, ადამიანის სახელი, ასოები, ციფრები, ბგერები, გამოსახულება, სამგანზომილებიანი ფიგურა, ასევე, საქონლის ფორმა, შეფუთვა ან საქონლის სხვა გარეგნული გაფორმება ფერის ან ფერთა კომბინაციის გამოყენებით.
როგორია სასაქონლო ნიშანზე განსაკუთრებული უფლებების მოქმედების ვადა?
ვადა განისაზღვრება 10 წლით, განაცხადის საქპატენტში წარდგენის თარიღიდან და შეიძლება გაგრძელდეს ყოველი შემდგომი 10 წლით, გაგრძელების ჯერადობის შეუზღუდავად.