2021 წელს ბოსტნეული საქართველოში ყველაზე მეტად გაძვირდა. ამის მიზეზად სპეციალისტები კონკურენციის დაბალ დონეს და მცირე ფერმერული მეურნეობების პრობლემას მიიჩნევენ. როგორც აგრარული სფეროს სპეციალისტი ანზორ მესხიშვილი ,,კომერსანტთან“ აღნიშნავს, საქართველოს აქვს პოტენციალი, რომ ბოსტნეული კულტურებით ადგილობრივი ბაზრის მოთხოვნა 100%-ით დააკმაყოფილოს, მაგრამ რეალურად ამის ნახევარიც  ვერ სრულდება. 

მისივე ინფორმაციით, ქართულ პროდუქტს იმპორტულთან კონკურენციის გაწევა უჭირს, რამაც საბოლოოდ წარმოების შემცირება გამოიწვია.

,,ბოსტნეულის ბაზარზე ერთ-ერთი მთავარი პრობლემა კონკურენციის დაბალი დონეა. ადგილობრივი წარმოება დიდი ხნის განმავლობაში იგნორირებული იყო იმის გამო, რომ იმპორტული პროდუქტი შემოდის დემპინგური ფასით. მხოლოდ ახლა, პანდემიურ პერიოდში მიექცა ეროვნულ აგროწარმოებას ყურადღება და შედეგი ასე მალე ვერ მიიღწევა. სამწუხაროდ, მთავრობა ძალიან გვიან მიხვდა, რომ აგრარული სექტორი უფრო მნიშვნელოვანია ეკონომიკისთვის, ვიდრე ტურიზმი და აუცილებელია ფერმერული მეურნეობების განვითარება. ამისთვის სოფლის მეურნეობის პროექტები აქტიურად უნდა განხორციელდეს და მათი მასშტაბი გაიზარდოს. წარმოების ტემპს მხოლოდ ეს დააჩქარებს. ჩვენს შემთხვევაში, პროექტებით მოსარგებლე ბენეფიციარების უმეტესობა მსხვილი ფერმერები არიან. ფიზიკური პირებს, რომლებიც შპს ან მეწარმეებად არ არიან დარეგისტრირებული, კრედიტით სარგებლობა შეზღუდული აქვთ. არაერთი მაგალითია, როცა დაბალი და საშუალო რგოლი პროექტებში ვერ იღებს მონაწილეობას, რაც სექტორისთვის დიდი პრობლემაა. ამ დროს ბოსტნეულის წარმოების დიდი პოტენციალი გაგვაჩნია, შეიძლება, მარცვლეული ვერ ვაწარმოოთ საკმარისი რაოდენობით, მაგრამ ბოსტნეულის იმპორტი არ გვჭირდება“, - აცხადებს ანზორ მესხიშვილი.

წარმოების კლებაზე საუბრობს ,,კომერსანტთან“ მეწარმე ჯუმბერ ბელთაძე, რომლის ინფორმაციითაც, განსაკუთრებით დიდი პრობლემაა მემწვანილეობაში, სადაც მუშახელის სიმცირე ერთ-ერთი სერიოზული გამოწვევაა.

,,ყოველწლიურად 100 ტონამდე მწვანილი გაგვქონდა ექსპორტზე და წელს ეს მაჩვენებელი დაახლოებით 25%-ით შეგვიმცირდა, მოსავლიანობაში მკვეთრი კლება გვქონდა. პანდემიამ ამ მხრივ დიდი დაბრკოლება შექმნა, ფასები გლობალური პრობლემაა. ჩვენს შემთხვევაში ამას დაემატა მუშახელთან დაკავშირებული პრობლემაც, ამიტომ პროდუქტი მასიურად გაძვირდა. მართალია, სეზონზე მწვანილი 5-6 ლარად იყიდება, მაგრამ სამომხმარებლო ბაზარზე ხარისხიანი ქართული მწვანილი 7-8 ლარზე ნაკლები არ ღირს. თუკი გლობალურ ბაზრებზე პრობლემა ლოგისტიკას უკავშირდება, შიდა ბაზარზე პრობლემაა კადრების დეფიციტი. სასათბურე მეურნეობები უფრო უნდა განვითარდნენ და თანამედროვე სტანდარტთან შესაბამისობაში იყოს, რომ წარმოებაში წყვეტა არ გვქონდა. მართალია, რამდენიმე სასათბურე მეურნეობა მთავრობის თანადაფინანსებით შეიქმნა, მაგრამ არასაკმარისია და კადრებთან ერთად, ინფრასტრუქტურაც გამოწვევებს შორისაა“, - ამბობს ჯუმბერ ბელთაძე ,,კომერსანტთან“.

ცნობისთვის, სურსათისა და უალკოჰოლო სასმელების ჯგუფში ბოსტნეული და ბაღჩეული ყველაზე მეტად არის გაძვირებული. კერძოდ, 2021 წელს ზრდა ამ მიმართულებით 23,3%-ს შეადგენს.

სტატისტიკის ეროვნული სამსახურის მონაცემით, იანვარში ინფლაციის დონემ გასული წლის ანალოგიურ პერიოდთან შედარებით 13.9% შეადგინა, ბოლო 12 თვეში კი სამომხმარებლო ფასები საშუალოდ 10.5%-ით გაიზარდა.

 მარი ჩიტაია